धाराशिवच्या राजकीय कुरुक्षेत्रावर आतापर्यंत फक्त भाजपमधला ‘जुना विरुद्ध नवा’ आणि ‘निष्ठावंत विरुद्ध घराणेशाही’ हाच राडा चर्चेत होता. पण थांबा! पिक्चर अभी बाकी है! कारण, आता खरी ‘फायर’ पाहायला मिळणार आहे ती उप मुख्यमंत्री एकनाथ शिंदे यांच्या शिवसेनेत! खासदार ओमराजे निंबाळकर यांच्या एन्ट्रीने शिंदे गटात आधीच अस्तित्वात असलेल्या ‘गटातटांच्या’ राजकारणाला असा काही तडका दिलाय, की आता इथेही मोठा राजकीय स्फोट होण्याची शक्यता निर्माण झाली आहे.
शिंदे गटातले तीन ‘किंगमेकर’ अन् त्यांचे गट!
शिंदे सेनेत आधीपासूनच तीन वेगवेगळे गट आपापली ‘हवा’ करून आहेत. यातील प्रत्येकाचा स्वतःचा असा वेगळा ‘बेस’ आहे:
-
१. ‘कॅबिनेट’ पॉवर (तानाजी सावंत गट): माजी मंत्री आणि आमदार तानाजी सावंत यांचा हा सर्वात प्रबळ गट. जिल्हा परिषदेत यांचे जवळपास ८ सदस्य आहेत. शिवाय भूम आणि परंड्याच्या नगराध्यक्षांवरही सावंत साहेबांचाच होल्ड आहे.
-
२. ‘गायकवाड’ घराणे (रवींद्र गायकवाड गट): माजी खासदार रवींद्र गायकवाड यांचाही जिल्ह्यात मोठा दबदबा आहे. झेडपीत त्यांचे ५ सदस्य आहेत आणि पत्नी उषाताई गायकवाड या जिल्हा परिषदेच्या उपाध्यक्ष आहेत. तर उमरगा नगर परिषदेची सत्ता स्वतःच्या मुलाकडे, म्हणजेच नगराध्यक्ष किरण गायकवाड यांच्याकडे आहे.
-
३. ‘साहेबांचे’ छुपे रुस्तम (राणा पाटील समर्थक): शिंदे सेनेच्या तिकिटावर निवडून आलेले २ झेडपी सदस्य आहेत, पण गंमत म्हणजे हे सदस्य थेट भाजपचे आमदार राणा पाटील यांच्या इशाऱ्यावर चालतात!
‘ओमराजे’ नावाची त्सुनामी आणि ‘सावंत-निंबाळकर’ युती!
२३ जून रोजी खासदार ओमराजे निंबाळकर यांनी शिवसेना (ठाकरे गट) सोडून अधिकृतपणे शिंदे गटात प्रवेश केला. आणि येताना ते एकटे आले नाहीत! ठाकरे गटाच्या ७ पैकी ५ झेडपी सदस्यांना त्यांनी आपल्यासोबत आणले. याशिवाय धाराशिव आणि कळंब नगरपालिकेतील ठाकरे गटाचे काही महत्त्वाचे शिलेदारही ओमराजेंसोबत आले आहेत.
सर्वात महत्त्वाची राजकीय खेळी म्हणजे- तानाजी सावंत आणि ओमराजे निंबाळकर आता ‘एक’ झाले आहेत! ओमराजेंच्या या एन्ट्रीमुळे जिल्ह्यात शिंदे गटाची ताकद ‘डबल’ झाली असली, तरी पदाधिकाऱ्यांच्या गणितात मात्र चांगलीच गडबड झाली आहे.
सोलापूरचा ‘राडा’ अन् कार्यकारिणी ‘बरखास्त’!
ओमराजे शिंदे गटात आल्यावर काही जुन्या पदाधिकाऱ्यांच्या पोटात गोळा आला. त्याच्या मागच्या काळात धाराशिव-कळंबचे अध्यक्ष सूरज महाराज साळुंके यांना पदावरून हटवून, त्या जागी भाजप आमदार राणा पाटील यांचे समर्थक अजित पिंगळे यांची नियुक्ती करण्यात आली.
या एका निर्णयावरून शिंदे सेनेत असा काही ‘राडा’ झाला की, सोलापूर येथे खासदार श्रीकांत शिंदे यांनी घेतलेल्या बैठकीत थेट गोंधळ उडाला! परिस्थिती इतकी हाताबाहेर गेली की, वरिष्ठांना जिल्ह्यातील संपूर्ण कार्यकारिणीच बरखास्त करावी लागली. आता यातील सर्वात मोठा ट्विस्ट म्हणजे, पदावरून काढलेले सूरज महाराज साळुंके आणि सुधीर पाटील हे आता थेट ओमराजेंचे ‘कट्टर समर्थक’ बनले आहेत!
पुढे काय? नवा राडा की बॅलन्स?
सध्या जिल्ह्याची कार्यकारिणी पूर्णपणे बरखास्त आहे. येत्या काही दिवसांत नवीन कार्यकारिणी जाहीर होईल आणि दोन नवे ‘जिल्हाप्रमुख’ नियुक्त केले जातील. आता हायकमांडला जुना आणि नवा गट एकत्र करून ‘बॅलन्स’ साधण्याची मोठी कसरत करावी लागणार आहे.
पण राजकारणातल्या गणितानुसार एक गोष्ट मात्र फिक्स मानली जात आहे- या नव्या कार्यकारिणीत खासदार ओमराजे यांचाच ‘वरचष्मा’ राहणार! आता प्रश्न हा आहे की, जसजशी नवी पदे वाटली जातील, तसतसा भाजपप्रमाणेच शिंदे गटातही ‘जुने विरुद्ध नवे’ असा राडा पाहायला मिळणार का? धाराशिवच्या राजकारणातला हा नवा सस्पेन्स आता चांगल्याच रंजक वळणावर आला आहे!
