उमरगा – उमरगा ते आळंद जाणाऱ्या रस्त्यावरील कसगी येथे पिकअप वाहनातून बेकायदेशीररीत्या गोमांसाची वाहतूक करणाऱ्या एका तरुणाला उमरगा पोलिसांनी रंगेहात पकडले आहे. या कारवाईत ४० किलो गोमांसासह पिकअप वाहन असा एकूण १ लाख ५८ हजार रुपयांचा मुद्देमाल जप्त करण्यात आला असून, आरोपीविरुद्ध प्राणी संरक्षण कायद्यान्वये गुन्हा नोंदवण्यात आला आहे.
नेमकी कारवाई काय?
मिळालेल्या गुप्त माहितीच्या आधारे, उमरगा पोलीस ठाण्याच्या पथकाने २२ ऑगस्ट २०२६ रोजी सकाळी ८.५० वाजेच्या सुमारास कसगी येथील बसवेश्वर चौकात नाकाबंदी केली होती.
यादरम्यान उमरगा बाजूकडून आळंदकडे जाणारे पिकअप वाहन (क्रमांक MH 25 AJ 2414) संशयावरून अडवून तपासणी करण्यात आली. तपासणीत वाहनात विक्रीच्या उद्देशाने विनापरवाना बेकायदेशीररीत्या वाहतूक करण्यात येत असलेले ८ हजार रुपये किमतीचे ४० किलो गोवंशीय जनावरांचे मांस आढळून आले.
वाहनासह १.५८ लाखांचा मुद्देमाल जप्त
पोलिसांनी ८ हजार रुपयांचे गोमांस आणि वाहतुकीसाठी वापरण्यात आलेले १ लाख ५० हजार रुपये किमतीचे पिकअप वाहन असा एकूण १ लाख ५८ हजार रुपयांचा मुद्देमाल जप्त केला.
याप्रकरणी पिकअप चालक इरफान मजर कुरेशी (वय २६ वर्षे, रा. गुंजोटी, ता. उमरगा) याच्याविरुद्ध पोलिसांनी सरकारतर्फे दिलेल्या फिर्यादीवरून महाराष्ट्र प्राणी संरक्षण अधिनियम कलम ५(क), ५(ड) आणि ९(अ) अन्वये उमरगा पोलीस ठाण्यात गुन्हा दाखल केला आहे. या प्रकरणाचा पुढील तपास पोलीस करत आहेत.
