परंडा – परंडा शहरातील भरवस्तीत जुन्या पैशांच्या व्यवहारावरून दोन गटांत जोरदार राडा झाल्याची घटना घडली आहे. मंडई पेठ चौकात लाठ्या-काठ्या, लोखंडी पाईप आणि दगडांनी एकमेकांवर हल्ला करत सार्वजनिक शांततेचा भंग केल्याप्रकरणी तसेच परिसरात दहशत पसरवून दुकाने बंद पाडल्याप्रकरणी परंडा पोलिसांनी तब्बल २३ जणांविरोधात गंभीर कलमान्वये गुन्हा दाखल केला आहे.
नेमकी घटना काय?
मिळालेल्या माहितीनुसार, २१ ऑगस्ट २०२६ रोजी रात्री ८.०० वाजेच्या सुमारास परंडा येथील मंडई पेठ चौकात जुन्या पैशांच्या देवाणघेवाणीवरून दोन गटांतील व्यक्ती आमनेसामने आल्या. आरोपींनी बेकायदेशीर जमाव जमवून हातात लाठ्या, काठ्या, लोखंडी पाईप आणि दगड घेऊन एकमेकांशी वाद घालत तुंबळ हाणामारी सुरू केली. या राड्यामुळे चौकात प्रचंड तणावाचे वातावरण निर्माण झाले आणि आजूबाजूच्या दुकानदारांनी भीतीपोटी पटापट दुकाने बंद केली.
गुन्हा दाखल करण्यात आलेले २३ आरोपी:
-
बागवान गल्ली : नसीम अहमेद पठाण, शफी अहमद पठाण, हैदर साजीद शेख, नदीन गफार पठाण, अरबाज ईनायत पठाण, फिरोज अहमद पठाण.
-
सीना कोळेगाव कॉलनी समोर : आसीफ वजीर शेख, वजीर पाशा शेख, अहजर चाँदपाशा शेख, जावेद रज्जाक शेख, राजू रज्जाक शेख.
-
मंडई पेठ : लतीफ बाशा शेख, गौस वजीर शेख, मुस्ताफा अज्जू मुजावर.
-
उमनउल्ला मशिदीच्या पाठीमागे : सरवर साबेर पठाण, मुशीन बडेमियाखाँ पठाण, बाबा शमशादखाँ पठाण, वसीम पठाण, फयाज पठाण, जाबाज पठाण, बबलू पठाण, इरफान पठाण, मुज्जू पठाण (सर्व रा. परंडा).
पोलिसांतर्फे गुन्हा दाखल
सार्वजनिक शांततेचा भंग करून दहशत पसरवल्याप्रकरणी परंडा पोलीस ठाण्याचे पोलीस अंमलदार भुजंग सुखदेव अडसुळ यांनी सरकारतर्फे दिलेल्या फिर्यादीवरून २२ ऑगस्ट २०२६ रोजी सर्व २३ आरोपींविरुद्ध भारतीय न्याय संहिता (BNS) कलम १९४(२), १२५, १९१(२), १९१(३) आणि १९० अन्वये गुन्हा नोंदवण्यात आला आहे. परंडा पोलीस या प्रकरणाचा पुढील तपास करत आहेत.
