तुळजापूर: श्री क्षेत्र तुळजापूर येथे कुलस्वामिनी श्री तुळजाभवानी देवीचा शारदीय नवरात्र महोत्सव ११ ऑक्टोबरपासून मोठ्या उत्साहात साजरा होणार आहे. परंपरेनुसार ३ ऑक्टोबर रोजी देवीची मंचकी निद्रा सुरू होईल, तर ११ ऑक्टोबर रोजी घटस्थापना होणार आहे. या महोत्सवात देशभरातून येणाऱ्या लाखो भाविकांना सुरळीत व सुरक्षित दर्शन घेता यावे, यासाठी जिल्हा प्रशासनाने सर्व विभागांची पूर्वतयारी पूर्ण केली आहे. स्थानिक सैनिकी विद्यालयात जिल्हाधिकारी किर्ती किरण पुजार यांच्या अध्यक्षतेखाली नुकतीच सर्व विभागांची आढावा बैठक पार पडली.
प्रशासनाकडून करण्यात आलेल्या महत्त्वाच्या उपाययोजना:
-
कडक पोलिस बंदोबस्त व वाहतूक नियंत्रण: भाविकांच्या सुरक्षिततेसाठी २ हजार ८०० पोलिसांचा फौजफाटा तैनात करण्यात आला आहे. गर्दीच्या काळात वाहतूक कोंडी टाळण्यासाठी मार्गांमध्ये आवश्यक बदल केले जातील आणि वाहतूक नियोजनासाठी स्वतंत्र पथके काम पाहतील.
-
तातडीची आरोग्य सेवा: शहराकडे येणाऱ्या सहा प्रमुख मार्गांवर २२ प्रथमोपचार केंद्रे उभारण्यात येत आहेत. गर्दीच्या ठिकाणी तत्काळ मदतीसाठी बाईक ॲम्ब्युलन्स तैनात राहतील तसेच साथरोग नियंत्रण पथकेही सज्ज असतील.
-
नगर परिषदेच्या भौतिक सुविधा: भाविकांसाठी घाटशीळ येथे दर्शन मंडप, शहरात ठिकठिकाणी विश्रामकक्ष, चप्पल स्टँड, लॉकर, शुद्ध पिण्याचे पाणी आणि भवानी कुंड येथे स्नानगृहांची व्यवस्था करण्यात आली आहे. याशिवाय शहरात २०० मोबाईल टॉयलेटची सोय उपलब्ध केली जाईल.
-
अन्न सुरक्षा तपासणी: भाविकांना दिल्या जाणाऱ्या खाद्यपदार्थांच्या गुणवत्तेवर अन्न व औषध प्रशासनाचे काटेकोर लक्ष राहील. खवा, पेढे, दूध व तेलाचे नमुने तपासले जाणार असून अन्न विक्रेत्यांसाठी स्वच्छता नियमावलीची कार्यशाळा घेण्यात येणार आहे.
-
रस्ते दुरुस्ती व वीजपुरवठा: शहराकडे येणाऱ्या सर्व प्रमुख रस्त्यांवरील खड्डे बुजविण्याचे काम सार्वजनिक बांधकाम विभागाकडून वेगाने सुरू असून मार्गदर्शक फलक लावण्यात आले आहेत. महावितरणकडून नवरात्र काळात शहरात २४ तास अखंडित वीजपुरवठा ठेवण्यात येईल.
या आढावा बैठकीला पोलिस अधीक्षक रितू खोकर, जिल्हा परिषदेचे अतिरिक्त मुख्य कार्यकारी अधिकारी निलेश काळे, अपर पोलिस अधीक्षक सचिन पांडकर, उपविभागीय अधिकारी ओंकार देशमुख, उपविभागीय पोलिस अधिकारी मनोहर पाटील, तहसीलदार अरविंद बोळंगे, व्यवस्थापक माया माने, महंत हमरोजी बुवा, पुजारी मंडळाचे अध्यक्ष विपिन शिंदे, अमरराजे कदम, आपसिंगेकर यांसह विविध विभागांचे प्रमुख अधिकारी उपस्थित होते. यंदाच्या नवरात्रोत्सवात भाविकांची स्वच्छता, आरोग्य आणि सुरक्षा यांना प्रशासनाकडून सर्वोच्च प्राधान्य देण्यात येत आहे.
