उमरगा / मुरुम – भिक्षा मागण्याच्या बहाण्याने घरात घुसून चाकूचा धाक दाखवत विवाहितेला लुटल्याची थरारक घटना उमरगा तालुक्यातील काळनिंबाळा येथे घडली आहे. दोन अज्ञात भामट्यांनी घरात प्रवेश करून रोख रक्कम, सोन्याचे दागिने आणि मोबाईल असा एकूण ५ लाख ६९ हजार रुपयांचा मुद्देमाल जबरीने हिसकावून नेला असून, याप्रकरणी मुरुम पोलीस ठाण्यात गुन्हा दाखल करण्यात आला आहे.
नेमकी घटना काय?
काळनिंबाळा (ता. उमरगा) येथील रहिवासी सोनाली प्रेमनाथ सगर (वय २६ वर्षे) या आपल्या राहत्या घरात असताना दोन अनोळखी इसम भिक्षा मागण्याच्या उद्देशाने घराच्या दारात आले.
घरात प्रवेश करताच त्यांनी अचानक धारदार चाकू बाहेर काढून सोनाली यांना जीवे मारण्याची धमकी दिली. चाकूचा धाक दाखवून त्यांनी घरातील रोख रक्कम, सोन्याचे मौल्यवान दागिने आणि मोबाईल फोन असा एकूण ५ लाख ६९ हजार रुपयांचा मुद्देमाल जबरदस्तीने हिसकावून घेतला आणि तिथून पोबारा केला.
मुरुम पोलिसांत गुन्हा दाखल
या धक्कादायक घटनेनंतर फिर्यादी सोनाली सगर यांनी मुरुम पोलीस ठाण्यात धाव घेऊन आपबिती कथन केली. त्यांच्या प्रथम खबरेवरून २८ ऑगस्ट २०२६ रोजी अज्ञात दोन आरोपींविरुद्ध भारतीय न्याय संहिता (BNS) कलम ३०९(४) (जबरी चोरी) अन्वये गुन्हा नोंदवण्यात आला आहे. भरदिवसा घडलेल्या या जबरी चोरीच्या घटनेमुळे परिसरात घबराटीचे वातावरण पसरले असून, मुरुम पोलीस संशयित आरोपींचा शोध घेत आहेत.
