तुळजापूर – तुळजापूर शहरातील बागवान शॉपिंग सेंटरमधील एका कपडे शिवण्याच्या (टेलरिंग) दुकानात घुसून १० हजार रुपयांची खंडणी मागितल्याची आणि ती देण्यास नकार दिल्याने चालकाला मारहाण करत खिशातील साडेसात हजार रुपयांची रोकड बळजबरीने लुटल्याची घटना समोर आली आहे. याप्रकरणी तुळजापूर पोलीस ठाण्यात दोन तरुणांविरुद्ध जबरी चोरी व खंडणीचा गुन्हा दाखल करण्यात आला आहे.
नेमकी घटना काय?
ताकविकी (ता. जि. धाराशिव) येथील रहिवासी संतोष विनायक जाधव (वय ४५ वर्षे) यांचे तुळजापूर येथील बागवान शॉपिंग सेंटरमध्ये कपडे शिवण्याचे दुकान आहे. ११ सप्टेंबर २०२६ रोजी दुपारी १.०० वाजेच्या सुमारास ते दुकानात काम करत होते.
त्यावेळी तुळजापूर येथील ओमकार लक्ष्मीकांत भिसे आणि करण संतोष परदेशी हे दोघे त्यांच्या दुकानात आले. त्यांनी संतोष जाधव यांच्याकडे थेट १० हजार रुपयांची मागणी केली. त्यावर “तुम्हाला कशाचे आणि का पैसे देऊ?” असा जाब जाधव यांनी विचारला. याचा राग आल्याने दोन्ही आरोपींनी जाधव यांना अश्लील शिवीगाळ करण्यास सुरुवात केली. त्यानंतर त्यांना लाथाबुक्क्यांनी बेदम मारहाण करत जीवे ठार मारण्याची धमकी दिली. तसेच त्यांच्या खिशातील ७ हजार ५०० रुपयांची रोख रक्कम बळजबरीने हिसकावून घेऊन दोघेही पसार झाले.
तुळजापूर पोलिसांत गुन्हा नोंद
या घटनेनंतर संतोष जाधव यांनी ११ सप्टेंबर २०२६ रोजी तुळजापूर पोलीस ठाण्यात जाऊन फिर्याद दिली. त्यांच्या प्रथम खबरेवरून पोलिसांनी आरोपी ओमकार लक्ष्मीकांत भिसे आणि करण संतोष परदेशी (दोघे रा. तुळजापूर) या दोघांविरुद्ध भारतीय न्याय संहिता (BNS) कलम ३०८(२) (खंडणी/जबरी वसुली) आणि ३(५) अन्वये गुन्हा नोंदवला आहे. या प्रकरणाचा पुढील तपास तुळजापूर पोलीस करत आहेत.
