एसटी बसमध्ये बनावट दिव्यांग कार्ड वापरून फसवणूक; आगार प्रमुखासह प्रवाशाविरुद्ध तुळजापूर पोलिसांत गुन्हा दाखल

तुळजापूर / धाराशिव:  महाराष्ट्र राज्य मार्ग परिवहन महामंडळाच्या (एसटी) बसमध्ये बनावट दिव्यांग ओळखपत्र (कार्ड) वापरून शासनाची फसवणूक केल्याप्रकरणी, तसेच महिला वाहक व चालकास दमदाटी करून पुरावा नष्ट करण्याचा प्रयत्न केल्याप्रकरणी तुळजापूर आगार प्रमुखासह एका प्रवाशाविरुद्ध तुळजापूर पोलीस ठाण्यात गुन्हा दाखल करण्यात आला आहे. छगन बापुराव लोखंडे आणि तुळजापूरचे आगार प्रमुख (DM) राम शिंदे अशी गुन्हा दाखल झालेल्यांची नावे आहेत.

नेमकी घटना काय?

मिळालेल्या माहितीनुसार, २६ जानेवारी २०२६ रोजी सकाळी धाराशिव ते सोलापूर (बस क्र. MH 20 BL 2583) या मार्गावर एसटी चालक उमेश दिलीप पवार आणि महिला वाहक सौ. आर. एस. पवार हे कर्तव्यावर होते. कावलधारा गावाजवळ प्रवासी छगन बापुराव लोखंडे यांनी बसमध्ये प्रवास करताना ५३ टक्के शारीरिक दुर्बलतेचे १/४ सवलतीचे दिव्यांग कार्ड दाखवून सवलतीच्या तिकिटाची मागणी केली.

महिला वाहकाने महाव्यवस्थापकांच्या परिपत्रकानुसार मोबाईल ॲपवर सदर कार्डची तपासणी केली असता ते कार्ड संशयास्पद व बनावट असल्याचे लक्षात आले आणि प्रणालीवर त्याची कोणतीही नोंद आढळली नाही. वाहकाने मूळ तिकिटाची मागणी केली असता, लोखंडे यांनी महिला वाहकाशी हुज्जत घालत अरेरावीची भाषा वापरली व वाद घातला.

आगार प्रमुखांचा दबाव आणि पुरावा नष्ट करण्याचा प्रयत्न

या प्रवासादरम्यान तुळजापूरचे आगार प्रमुख राम शिंदे हे देखील त्याच बसमध्ये प्रवास करत होते. प्रवासी लोखंडे हे आपल्या परिचयाचे असल्याने आगार प्रमुख शिंदे यांनी शासकीय नियमांचे उल्लंघन करून कर्मचाऱ्यांवर दबाव आणला. “याला सवलतीचे तिकीट द्या, नाहीतर निलंबन करू,” अशी धमकी देत त्यांनी महिला वाहकावर दबाव आणून सवलतीचे तिकीट देण्यास भाग पाडले, असा आरोप फिर्यादीत करण्यात आला आहे.

बस तुळजापूर स्थानकात पोहोचल्यानंतर प्रवासी लोखंडे यांनी बस आडवून चालक व वाहकास जीवे मारण्याची धमकी दिली. त्यावेळी आगार प्रमुख राम शिंदे यांनी शासकीय कारवाई करण्याऐवजी उलट “लोखंडे माझ्या जवळचा आहे, त्याचे कार्ड जमा करू नका, फाडून टाका” असा बेकायदेशीर आदेश देऊन शासकीय पुरावा नष्ट करण्याचा प्रयत्न केला, असे तक्रारीत म्हटले आहे.

माहिती अधिकारात कार्ड बनावट असल्याचे उघड

यानंतर संबंधित विभागाशी व जिल्हा दिव्यांग सक्षमीकरण कार्यालयाशी पत्रव्यवहार केला असता, छगन लोखंडे यांच्या नावावर असे कोणतेही ५३ टक्के दुर्बलतेचे कार्ड जारी करण्यात आले नसल्याचे स्पष्ट झाले. यानंतर वरिष्ठ अधिकाऱ्यांच्या आदेशानुसार चालक उमेश पवार यांनी तुळजापूर पोलीस ठाण्यात रीतसर तक्रार दाखल केली.

विविध कलमान्वये गुन्हा नोंद

चालक उमेश दिलीप पवार यांच्या फिर्यादीवरून तुळजापूर पोलीस ठाण्यात आरोपी छगन बापुराव लोखंडे आणि आगार प्रमुख राम शिंदे यांच्याविरुद्ध भारतीय न्याय संहिता (BNS) २०२३ चे कलम १३२, २२१, २३८ (पुरावा नष्ट करणे), ३१८(४) (फसवणूक), ३३६(३), ३४०(२), १२६, ३५१(२), ३५१(३) (धमकावणे), ३५२ आणि ३(५) अन्वये गुन्हा (गु.र.नं. ०४६१/२०२६) दाखल करण्यात आला आहे. या प्रकरणाचा पुढील तपास तुळजापूर पोलीस करत आहेत.

पोलिसांची ८ महिने टोलवाटोलव, आगार प्रमुखाला पाठीशी घालण्याचा प्रयत्न; एसटी चालकाच्या आत्मदहनाच्या इशाऱ्यानंतर अखेर FIR