भूम – भूम तालुक्यातील सुकटा शिवारात पवनचक्कीच्या वादातून एका व्यक्तीला अडवून लोखंडी रॉडने बेदम मारहाण केल्याच्या गुन्ह्यात गेल्या काही महिन्यांपासून फरार असलेला मुख्य आरोपी सचिन उर्फ भैय्या बबन जानकर याला भूम पोलिसांच्या पथकाने लोणावळा येथून शिताफीने अटक केली आहे. वाढदिवस आणि पार्टी साजरी करण्यासाठी तो लोणावळ्यात आला असताना पोलिसांनी स्थानिक पोलिसांच्या मदतीने सापळा रचून त्याला गजाआड केले.
नेमकी घटना आणि पार्श्वभूमी
सुकटा शिवारात पवनचक्कीच्या कारणावरून फिर्यादीस रस्त्यात अडवून बेकायदेशीर जमाव जमवून लोखंडी रॉडने गंभीर मारहाण करण्यात आली होती. याप्रकरणी भूम पोलीस ठाण्यात गु.र.नं. २०८/२०२५ अन्वये भारतीय न्याय संहिता (BNS) कलम १८९(२), १९१(२), १९१(३), ११८(२), १९०, ११८(१), ४९, ३२४(४) आणि ३५१(३) नुसार गुन्हा दाखल करण्यात आला होता.
या गुन्ह्याचा तपास तत्कालीन तपास अधिकारी सपोनि बळीराम बंदखडके यांनी पूर्ण करून निष्पन्न आरोपींविरुद्ध न्यायालयात दोषारोपपत्र (चार्जशीट) दाखल केले होते. मात्र, या गुन्ह्यातील मुख्य सूत्रधार सचिन उर्फ भैय्या बबन जानकर (वय ३१ वर्षे, रा. सुकटा, ता. भूम) हा गुन्हा घडल्यापासून पोलिसांना गुंगारा देऊन सतत फरार होता.
लोणावळ्यात वाढदिवसाच्या पार्टीचा बेत; पोलिसांनी रचला सापळा
दरम्यान, फरार असलेला मुख्य आरोपी सचिन उर्फ भैय्या जानकर हा आपला वाढदिवस साजरा करण्यासाठी आणि मित्रांसोबत पार्टी करण्यासाठी लोणावळा (जि. पुणे) येथे येणार असल्याची गोपनीय माहिती परिविक्षाधीन पोलीस उपअधीक्षक तथा भूम पोलीस ठाण्याचे प्रभारी अधिकारी अमोल मोहिते यांना मिळाली.
माहिती मिळताच मोहिते यांनी तत्काळ तपासाची चक्रे फिरवत विशेष पथक रवाना केले. भूम पोलिसांच्या पथकाने लोणावळा ग्रामीण पोलिसांशी समन्वय साधून लोणावळा परिसरात गुप्तपणे सापळा रचला. त्यानंतर रात्रीच्या सुमारास संशयित आरोपीच्या मुसक्या आवळत त्याला शिताफीने ताब्यात घेतले.
पुणे आणि धाराशिव जिल्ह्यात गंभीर गुन्ह्यांची नोंद
अटक करण्यात आलेल्या सचिन जानकर याच्यावर पुणे आणि धाराशिव जिल्ह्यातील विविध पोलीस ठाण्यांमध्ये अपहरण, प्राणघातक हल्ला आणि बेकायदेशीर शस्त्र बाळगल्याप्रकरणी गंभीर गुन्हे दाखल आहेत:
१. वाकड पोलीस ठाणे (पुणे): गु.र.नं. ७९/२०१५ – भा.दं.वि. कलम ३२६, ३२३, ५०४, ५०६, ३४.
२. दिघी पोलीस ठाणे (पुणे): गु.र.नं. २८८/२०२० – भा.दं.वि. कलम ३६५, ३२३, ३२४, ५०४, ३४.
३. भूम पोलीस ठाणे (धाराशिव): गु.र.नं. २८८/२०२३ – भा.दं.वि. कलम ३२४, ३२५, १४३, १४७, १४८, १४९, ५०४, २०६.
४. हिंजवडी पोलीस ठाणे (पुणे): गु.र.नं. ३१५३/२०१३ – शस्त्र अधिनियम सह मुंबई पोलीस कायदा कलम ३७(१)(३)/१३५.
५. वाकड पोलीस ठाणे (पुणे): गु.र.नं. ११/२०१८ – मुंबई पोलीस कायदा कलम ३७(१)(३)/१३५.
कारवाई करणारे पोलीस पथक
ही धडक कामगिरी जिल्हा पोलीस अधीक्षक, अपर पोलीस अधीक्षक तसेच उपविभागीय पोलीस अधिकारी भूम यांच्या मार्गदर्शनाखाली परिविक्षाधीन पोलीस उपअधीक्षक अमोल मोहिते, पोलीस उपनिरीक्षक बर्डे, पोलीस अंमलदार अमोल कवडे आणि जयराम क्षीरसागर यांच्या पथकाने लोणावळा ग्रामीण पोलिसांच्या सहकार्याने यशस्वीरीत्या पार पाडली. अटक आरोपीला न्यायालयात हजर करण्यात आले असून, पोलीस या प्रकरणात पुढील कायदेशीर कारवाई करत आहेत.
