पोलिसांनी दिलेल्या माहितीनुसार, अभिजित उर्फ तन्या अर्जुन नवाट (रा. कोठाळवाडी), किरण भागवत तुपारे (रा. बोरगाव), अजय रामकिसन माने (रा. परळी रोड बायपास, कळंब) आणि अन्य एक जण अशी आरोपींची नावे आहेत.
६ नोव्हेंबर २०२६ रोजी दुपारी १ वाजण्याच्या सुमारास हा प्रकार घडला. फिर्यादी रागिणी रमेश कानगे (वय २३, रा. बोर्डा, ता. कळंब) यांच्या तक्रारीनुसार, आरोपींनी संगनमत करून एमएच २० डीव्ही ०३५७ क्रमांकाच्या इरटिगा वाहनातून अंबाजोगाई (जि. बीड) येथून येत बोर्डा येथे त्यांच्या घरात प्रवेश केला.
यावेळी आरोपींनी जातीवाचक शिवीगाळ केली. तसेच कोयत्याचा धाक दाखवून जिवे मारण्याची धमकी दिली आणि रागिणी यांना जबरदस्तीने वाहनात बसवून बोर्डा येथून दगडवाडी शिवारातील खडी केंद्रापर्यंत नेल्याचे फिर्यादीत नमूद आहे.
या प्रकरणी रागिणी कानगे यांनी ६ नोव्हेंबर रोजी कळंब पोलीस ठाण्यात फिर्याद दिली. त्यावरून आरोपींविरुद्ध भारतीय न्याय संहिता कलम १४०(१), ७४, ३३३, ३५२, ३५१(३), ३(५), शस्त्र अधिनियम कलम ४/२५ तसेच अनुसूचित जाती-जमाती अत्याचार प्रतिबंधक कायदा कलम ३(१)(आर), ३(१)(एस), ३(१)(डब्ल्यू)(आय), ३(१)(डब्ल्यू)(आयआय) आणि ३(२)(व्हीए) अन्वये गुन्हा दाखल करण्यात आला आहे.या गंभीर प्रकरणाचा पुढील तपास कळंब पोलीस करीत आहेत.
