कळंब : कळंब तालुक्यातील दोन वेगवेगळ्या गावांमधून दोन तरुणांचे अज्ञात व्यक्तींनी अपहरण केल्याच्या धक्कादायक घटना उघडकीस आल्या आहेत. डिकसळ येथील एक ३२ वर्षीय तरुण आणि देवधानोरा येथील एक २९ वर्षीय तरुण बेपत्ता झाले असून, दोघांनाही अज्ञात कारणासाठी डांबून ठेवण्याच्या उद्देशाने पळवून नेल्याचा संशय कुटुंबीयांनी व्यक्त केला आहे. या दोन्ही प्रकरणांत कळंब आणि शिराढोण पोलीस ठाण्यात अपहरणाचे स्वतंत्र गुन्हे दाखल करण्यात आले आहेत.
हैदराबादला फिरायला जातो म्हणून गेलेल्या तरुणाचे डिकसळमधून अपहरण
कळंब तालुक्यातील डिकसळ येथील एकतानगर भागातील रहिवासी संदीप बाबुराव फकीर (वय ३२ वर्षे) हा तरुण ४ नोव्हेंबर रोजी रात्री १०:०० वाजेच्या सुमारास घरातून “हैदराबाद येथे फिरायला जातो” असे सांगून बाहेर पडला होता. मात्र, तो परत न आल्याने आणि संपर्क न झाल्याने कुटुंबीयांची चिंता वाढली. कोणीतरी अज्ञात व्यक्तीने अज्ञात कारणासाठी त्याला गुप्तपणे व बेकायदेशीररीत्या डांबून ठेवण्याच्या उद्देशाने अपहरण करून नेल्याची तक्रार त्यांचा भाऊ धनंजय बाबुराव फकीर (वय ३४ वर्षे, रा. एकतानगर, डिकसळ) यांनी १२ नोव्हेंबर रोजी कळंब पोलीस ठाण्यात दिली. त्यांच्या फिर्यादीवरून कळंब पोलिसांनी अज्ञात आरोपीविरुद्ध भारतीय न्याय संहिता (BNS) कलम १४०(३) अन्वये गुन्हा नोंदवला आहे.
देवधानोरा येथून २९ वर्षीय तरुण बेपत्ता
दुसऱ्या घटनेत, कळंब तालुक्यातील देवधानोरा येथील रहिवासी अमोल मनोहर काळे (वय २९ वर्षे) हा तरुण ७ नोव्हेंबर रोजी सकाळी ९:०० वाजेच्या सुमारास गावातून अचानक बेपत्ता झाला. सर्वत्र शोध घेऊनही त्याचा पत्ता न लागल्याने, कोणीतरी अज्ञात व्यक्तीने अज्ञात कारणासाठी त्याला डांबून ठेवण्याच्या उद्देशाने गुप्तपणे पळवून नेल्याचा संशय व्यक्त करण्यात आला आहे. याप्रकरणी मनोहर मलाप्पा काळे (वय ५५ वर्षे, रा. देवधानोरा) यांनी १२ नोव्हेंबर रोजी शिराढोण पोलीस ठाण्यात फिर्याद दिली. त्यांच्या तक्रारीवरून शिराढोण पोलिसांनी अज्ञात व्यक्तीविरुद्ध भारतीय न्याय संहिता (BNS) कलम १४०(३) अन्वये अपहरणाचा गुन्हा दाखल केला आहे.
एकाच तालुक्यात दोन तरुणांच्या अपहरणाचे गुन्हे दाखल झाल्याने खळबळ उडाली असून, कळंब व शिराढोण पोलीस या दोन्ही तरुणांचा कसून शोध घेत आहेत.
