धाराशिव : सहकार क्षेत्रातील उल्लेखनीय कामगिरी आणि सातत्यपूर्ण व्यवसाय वृद्धीबद्दल धाराशिव येथील श्री सिद्धिविनायक मल्टिस्टेट को-ऑपरेटिव्ह क्रेडिट सोसायटी लिमिटेड या संस्थेला राष्ट्रीय स्तरावरील प्रतिष्ठित ‘एक्सलन्स इन बिझनेस ग्रोथ’ (Excellence in Business Growth) पुरस्काराने सन्मानित करण्यात आले.
नवी दिल्ली येथे आज (दि. १९ नोव्हेंबर) पार पडलेल्या ‘इंडियन को-ऑपरेटिव्ह समिट अँड एक्सलन्स अवॉर्ड्स २०२६’ या राष्ट्रीय सोहळ्यात संस्थेला हा मानाचा पुरस्कार प्रदान करण्यात आला. संस्थेच्या वतीने मुख्याधिकारी राजेश जाधव आणि सहमुख्याधिकारी अरविंद गोरे यांनी हा पुरस्कार स्वीकारला. यावेळी रिझर्व्ह बँकेचे संचालक सतीश मराठे, महाराष्ट्र राज्य सहकारी बँकेचे प्रशासकीय अध्यक्ष विद्याधर अनासकर यांच्यासह केंद्रीय सहकार विभागातील वरिष्ठ मान्यवर उपस्थित होते.
विश्वास आणि पारदर्शकतेची पावती सभासदांचा विश्वास, पारदर्शक व्यवहार, आर्थिक शिस्त, तत्पर ग्राहक सेवा आणि प्रभावी व्यवस्थापन यांच्या जोरावर संस्थेने अल्पावधीतच भरीव प्रगती साधली आहे. संस्थेच्या या व्यवसाय वृद्धीची आणि सहकार क्षेत्रातील योगदानाची राष्ट्रीय पातळीवर दखल घेतली गेल्याने जिल्ह्याच्या सहकार चळवळीत अभिमानाचे वातावरण आहे.
“हा पुरस्कार संस्थेवर सर्वांनी दाखविलेल्या विश्वासाचा आणि एकत्रित प्रयत्नांचा सन्मान आहे. या यशामुळे भविष्यातही सहकाराच्या माध्यमातून अधिक विश्वासार्ह सेवा आणि समाजाभिमुख कार्य करण्याची नवी ऊर्जा मिळाली आहे.” — दत्ताभाऊ कुलकर्णी, संस्थापक, श्री सिद्धिविनायक मल्टिस्टेट
या राष्ट्रीय सन्मानाबद्दल संस्थापक दत्ताभाऊ कुलकर्णी यांनी आनंद व्यक्त करत संस्थेशी जोडलेले सर्व सभासद, ठेवीदार, कर्जदार, हितचिंतक, संचालक मंडळ, अधिकारी आणि कर्मचाऱ्यांचे मनःपूर्वक आभार मानले आहेत. या यशामुळे धाराशिवच्या सहकार क्षेत्राचा नावलौकिक देशपातळीवर उंचावला असून, संस्थेच्या वाटचालीत हा एक ऐतिहासिक टप्पा ठरला आहे.




