धाराशिव : शहरातील शाहू नगर येथील काकडे प्लॉट परिसरातून एका ३४ वर्षीय तरुणाचे अज्ञात व्यक्तीने अज्ञात कारणासाठी गुप्तपणे अपहरण केल्याची घटना उघडकीस आली आहे. याप्रकरणी अपहृत तरुणाच्या वडिलांनी दिलेल्या तक्रारीवरून आनंदनगर पोलीस ठाण्यात अज्ञात आरोपीविरुद्ध अपहरणाचा गुन्हा दाखल करण्यात आला आहे.
मिळालेल्या माहितीनुसार, धाराशिव शहरातील शाहू नगर, काकडे प्लॉट येथील रहिवासी लक्ष्मण गोपाळकृष्ण कुलकर्णी (वय ६४ वर्षे) यांचा मुलगा गोपाळ लक्ष्मण कुलकर्णी (वय ३४ वर्षे) हा १५ नोव्हेंबर रोजी सकाळी ११:३० वाजेच्या सुमारास राहत्या परिसरातून अचानक बेपत्ता झाला आहे. सर्वत्र शोध घेऊनही त्याचा पत्ता न लागल्याने, कोणीतरी अज्ञात व्यक्तीने अज्ञात कारणासाठी त्याला डांबून ठेवण्याच्या उद्देशाने गुप्तपणे व बेकायदेशीररीत्या पळवून नेल्याचा संशय कुटुंबीयांनी व्यक्त केला आहे.
या घटनेमुळे कुलकर्णी कुटुंबीयांमध्ये चिंतेचे वातावरण निर्माण झाले असून, लक्ष्मण कुलकर्णी यांनी १८ नोव्हेंबर रोजी आनंदनगर पोलीस ठाण्यात धाव घेऊन फिर्याद दिली. त्यांच्या तक्रारीवरून आनंदनगर पोलिसांनी अज्ञात आरोपीविरुद्ध भारतीय न्याय संहिता (BNS) कलम १४०(३) (चुकीच्या पद्धतीने डांबून ठेवण्याच्या उद्देशाने अपहरण करणे) अन्वये गुन्हा नोंदवला आहे. या प्रकरणाचा पुढील तपास आनंदनगर पोलीस करत आहेत.





