धाराशिव – राष्ट्रीय आरोग्य अभियाना अंतर्गत मंजूर झालेली अनेक कामे मागील दोन वर्षांपासून प्रलंबित आहेत. या कामांचा कालावधी संपूनही कामे पूर्ण झाली नाहीत. यामुळे ग्रामीण भागातील लोकांना आरोग्य सुविधांमध्ये अडचणी येत आहेत. खा. ओमप्रकाश राजेनिंबाळकर यांनी वेळेत कामे पूर्ण न करणाऱ्या ठेकेदारांवर कारवाई करण्याची सूचना संबंधित अधिकाऱ्यांना केली आहे.
राष्ट्रीय आरोग्य अभियान अंतर्गत धाराशिव जिल्हयात खा. ओमप्रकाश राजेनिंबाळकर यांच्या प्रयत्नातून मंजुर कामे मागील दोन वर्षापासून प्रलंबीत होती. सदर कामे सुरु करुन त्यांचा काम पुर्ण होण्याचा कालावधी संपुनही कामे अद्याप अपुर्ण असल्याचे निदर्शनास आले. त्यानंतर खा. ओमप्रकाश राजेनिंबाळकर यांनी जिल्हा परीषदचे मुख्य कार्यकारी अधिकारी यांच्यासोबत या कामाचा आढावा घेणेबाबत बैठक घेतली.
या बैठकीत आमदार कैलास पाटील, जिल्हा परिषदचे अतिरिक्त मुख्य कार्यकारी अधिकारी विठ्ठल जाधव, कार्यकारी अभियंता (राष्ट्रीय आरोग्य अभियान) आणि इतर संबंधित अधिकारी उपस्थित होते. तसेच विविध एजन्सीचे प्रतिनिधीही बैठकीत सहभागी झाले होते.
खा. राजेनिंबाळकर यांनी बैठकीत म्हटले की, “राष्ट्रीय आरोग्य अभियाना अंतर्गत मंजूर झालेली अनेक कामे मागील दोन वर्षांपासून प्रलंबित आहेत. या कामांचा कालावधी संपूनही कामे पूर्ण झाली नाहीत. यामुळे ग्रामीण भागातील लोकांना आरोग्य सुविधांमध्ये अडचणी येत आहेत.”
यानंतर राजेनिंबाळकर यांनी जिल्हा परिषदच्या मुख्य कार्यकारी अधिकाऱ्यांना अशा ठेकेदारांवर कारवाई करण्याची सूचना दिली. यात कर्मचारी निवास, प्राथमिक आरोग्य केंद्र आणि प्राथमिक आरोग्य उपकेंद्राची कामे समाविष्ट आहेत.
याशिवाय नव्याने बांधलेल्या दवाखान्यांमध्ये कर्मचाऱ्यांची कमतरता असल्याचेही राजेनिंबाळकर यांनी लक्षात आणून दिले. त्यामुळे या दवाखान्यांमधील आरोग्य सेवा विस्कळीत झाली आहे. या समस्येचा त्वरित निराकरण करण्यासाठी आवश्यक ती पदभरती करण्याची सूचना राजेनिंबाळकर यांनी दिली.
राजेनिंबाळकर यांनी बैठकीत उपस्थित असलेल्या अधिकारी आणि ठेकेदार कंपन्यांच्या प्रतिनिधींना कामाचा दर्जा चांगला ठेवण्यास आणि कामे वेळेत पूर्ण करण्यास सूचना दिल्या. तसेच ते वेळोवेळी आवश्यक त्या ठिकाणी स्वतः पाहणी करून कामाची प्रगती आणि दर्जा यांचा आढावा घेणार असल्याचेही त्यांनी सांगितले.
या बैठकीमुळे धाराशिव जिल्ह्यातील राष्ट्रीय आरोग्य अभियानांतर्गत होणाऱ्या कामांमध्ये गती येण्याची आणि लोकांना आरोग्य सुविधांमध्ये सुधारणा होण्याची अपेक्षा आहे.
