धाराशिव – तालुक्यातील बामणी येथील कालिदास महादेव गुजर (५०) आणि राजूबाई कालिदास गुजर (४५) हे दांपत्य चिवरी येथील महालक्ष्मी देवीला नैवेद्य नारळ अर्पण करण्यासाठी दुचाकीने जात असताना खंडाळा पाटीवर एका भरधाव होंडा सिटी कारने त्यांच्या दुचाकीला धडक दिली. या अपघातात दोघेही जागीच ठार झाले.
ही घटना रविवारी दुपारी दीड वाजण्याच्या सुमारास घडली. दांपत्य दुचाकीने खंडाळा मार्गे चिवरीकडे जात होते. यावेळी लातूरहून तुळजापूरकडे जाणाऱ्या कारने (के. एम.एच.१४ के. जे. ३०२०) त्यांच्या दुचाकीला जोरदार धडक दिली. धडकेनंतर दुचाकी १० ते १५ फूट फरफटत गेली आणि दांपत्य जागीच ठार झाले.
या घटनेनंतर परिसरात हळहळ व्यक्त करण्यात आली. मृत दांपत्याच्या पश्चात दोन मुले, सून, नातवंडे असा परिवार आहे. त्यांच्यावर बामणी गावात अंत्यसंस्कार करण्यात आले.
धाराशिव जिल्ह्यात गेल्या काही दिवसांपासून अपघात वाढले आहेत. दररोज कुठं ना कुठं अपघात होत असून, यामुळे लोकांत चिंता व्यक्त केली जात आहे.
