अमरावती – राष्ट्रवादी काँग्रेससोबत आमचे कधीही पटले नाही, सध्या जरी एकत्र मांडीला मांडी लाऊन बसत असलो तरी बाहेर आलो की उलट्या होतात, असे म्हणत शिवसेना शिंदे गटाचे नेते, राज्याचे आरोग्यमंत्री तानाजी सावंत यांनी अजित पवार गटावर निशाणा साधला होता. तानाजी सावंत यांच्या या वक्तव्याने महायुतीत तणाव वाढला असून अजित पवार गटाने तीव्र नाराजी व्यक्त केली आहे. अशातच प्रहार संघटनेचे नेते, आमदार बच्चू कडू यांनीही यावरुन तानाजी सावंत यांच्यावर हल्लाबोल केला आहे.
आरोग्यमंत्री तानाजी सावंत यांनी , चांगल्या डॉक्टरला दाखवून उलटीच्या गोळ्या घ्याव्यात, त्यांच्याकडे नसतील मी पाठवून देतो, असा खोचक टोला आमदार बच्चू कडू यांनी लगावला आहे.
सावंत यांनी म्हटलं होत की, “काँग्रेस-राष्ट्रवादीशी आयुष्यात आपले पटले नाही, जरी आज मांडीला मांडी लावून बसलो असलो तरी बाहेर आलं की उलट्या होतात.” त्यांच्या या विधानामुळे सत्ताधारी पक्षांमध्ये नाराजीची भावना पसरली आहे. राष्ट्रवादी काँग्रेसचे प्रदेशाध्यक्ष सुनील तटकरे, प्रवक्ते अमोल मिटकरी, उमेश पाटील यांच्यासह अनेकांनी सावंत यांच्या या वक्तव्यावर टीका केली आहे आणि त्यांना आपल्या शब्दांची मर्यादा सांभाळण्याची गरज असल्याचे म्हटले आहे.
