धाराशिव जिल्ह्यात विधानसभा निवडणुकीची साक्षात ‘जत्रा’ सुरू झाली आहे! २० नोव्हेंबर रोजी होणाऱ्या मतदानाच्या रणधुमाळीत सध्या उमेदवार आपापल्या “तयारीत” व्यस्त आहेत. मात्र, या तयारीत अर्ज भरण्याचे फक्त दोन दिवस शिल्लक आहेत, त्यामुळे काही उमेदवारांनी अर्ज भरण्यासाठी ‘रेल्वे तिकीट’ मिळाल्यागत गर्दी केली आहे.
महायुतीने केलेली साखळी जुळवणं म्हणजे राजकीय संसार थाटण्यासारखं आहे, असं म्हटल्यास वावगं ठरणार नाही. धाराशिव जिल्ह्यात भाजप आणि शिवसेना (शिंदे गट) यांनी हातात हात घालून “तुळजापूर भाजपला तर उमरगा आणि परंडा शिवसेना (शिंदे गट) ला” अशी वाटणी करून घेतली आहे. मात्र, धाराशिव मतदारसंघ मात्र या वाटणीच्या ‘खिचडीत’ अजूनही अडकला आहे.
या रंगलेल्या रणधुमाळीत सुधीर पाटील, शिवाजी कापसे, अनिल खोचरे, सूरज साळुंके, धनंजय सावंत, नितीन लांडगे, केशव सावंत हे आठजण ‘भाई मला तिकीट दे ना!’ असा चेहरा घेऊन सज्ज झाले आहेत. पण आता नितीन काळे यांनीही भाजपला ‘रजा’ देण्याची तयारी दाखवली आहे, फक्त शिंदे गटाने त्यांना ‘ऑनबोर्ड’ केलं तर! त्यामुळे भाजपच्या एकेका बळकट पदाधिकाऱ्यांना शिंदे गटाकडे जाण्याची ‘आह्वानं’ येऊ लागली आहेत.
शिवसेनेचं तिकीट मिळालं तर कोण कुणाच्या गटात जाणार, हे इतकं गुंतागुंतीचं झालंय की धाराशिवच्या जनतेलाच आता ‘आम्ही कुठल्या गटात आहोत?’ असा प्रश्न पडावा. थोडक्यात काय, कोण कुणाच्या बाजूला उभं राहील आणि कोण शेवटच्या क्षणी हात वर करेल, हे अंतिम क्षणापर्यंत अनिश्चित आहे.
मुख्यमंत्री एकनाथ शिंदे या सगळ्या राजकीय नाटकात आज महत्त्वाचा निर्णय घेणार आहेत. तात्पर्य, धाराशिवची विधानसभा जागा म्हणजे एक जिवंत ‘सीरियल’ झाली आहे, आणि धाराशिवच्या जनतेला पाहायचंय की या नाटकाचा शेवट नेमका कसा होतो!
