धाराशिव: उमरगा येथील २६ वर्षीय प्रतिक्षा माने यांना ऑनलाईन फसवणुकीचा बळी व्हावे लागले होते. मात्र, धाराशिव सायबर पोलिसांच्या तत्परतेमुळे त्यांना ₹2,39,998 परत मिळाले आहेत.
प्रतिक्षा यांना एका अनोळखी व्यक्तीने फोन करून स्वतःला ICICI बँकेचा कर्मचारी असल्याचे भासवले. त्याने प्रतिक्षा यांच्या क्रेडिट कार्डवर ऑफर ॲक्टीव्हेट करण्यासाठी ओटीपी मागितला. प्रतिक्षा यांनी तीन वेळा ओटीपी दिल्यानंतर त्यांच्या खात्यातून ₹99,999, ₹99,999 आणि ₹40,000 असे तीन व्यवहार झाले.
प्रतिक्षा यांना संशय आल्याने त्यांनी तात्काळ धाराशिव सायबर पोलीस ठाण्यात तक्रार दाखल केली. पोलिसांनी तांत्रिक विश्लेषण केल्यानंतर असे आढळून आले की त्यांच्या क्रेडिट कार्डचा वापर करून ॲमेझॉनवर खरेदी करण्यात आली आहे. पोलिसांनी ॲमेझॉनशी संपर्क साधून खरेदीची ऑर्डर रद्द केली आणि प्रतिक्षा यांचे पैसे परत मिळवले.
ही कामगिरी पोलीस अधीक्षक संजय जाधव, अपर पोलीस अधीक्षक गौहर हसन यांच्या मार्गदर्शनाखाली पोलीस निरीक्षक सचिन यादव आणि त्यांच्या पथकाने केली आहे.
सायबर पोलिसांचे आवाहन:
या घटनेच्या पार्श्वभूमीवर, धाराशिव सायबर पोलिसांनी नागरिकांना कोणत्याही अनोळखी व्यक्तीला बँक खात्याची माहिती किंवा ओटीपी न देण्याचे आवाहन केले आहे. तसेच, सायबर गुन्हा घडल्यास तात्काळ हेल्पलाइन क्रमांक 1930 वर संपर्क साधावा किंवा http://www.cybercrime.gov.in या संकेतस्थळावर तक्रार नोंदवावी असे आवाहन करण्यात आले आहे.
