तुळजापूर तालुक्यात पवनचक्की उभारणीच्या नावाखाली शेतकऱ्यांच्या जमिनी हडप करण्याचे प्रकार सुरू आहेत. हे प्रकार अत्यंत निंदनीय असून शेतकऱ्यांच्या मूलभूत हक्कांवर गदा आणणारे आहेत. बारूळ गावात शेतकरी सचिन प्रभाकर ठोंबरे यांना पवनचक्की उभारणीला विरोध केल्याने ठेकेदाराने गुंडांच्या मदतीने बेदम मारहाण केली. ही घटना अत्यंत गंभीर असून ती लोकशाही आणि कायद्याचे राज्य या मूल्यांवर घाला घालणारी आहे.
या घटनेनंतर पोलिसांनी केवळ थातूरमातूर गुन्हा दाखल केला असून ठेकेदार आणि गुंडांवर कोणतीही कारवाई केलेली नाही. पोलिसांची ही निष्क्रिय भूमिका अत्यंत संशयास्पद आहे. पोलिसांच्या या निष्क्रिय भूमिकेच्या निषेधार्थ विशाल रोचकरी आणि शेतकरी कुटुंबियांनी तुळजापूर येथील छत्रपती शिवाजी चौकात उपोषण सुरू केले आहे. उपोषणकर्त्यांनी पोलिसांच्या अन्यायाचा निषेध करत गुंडांवर तातडीने कारवाई करण्याची मागणी केली आहे. पवनचक्की उभारणीच्या नावाखाली सुरू असलेल्या या गुंडगिरीमुळे शेतकऱ्यांमध्ये भीतीचे वातावरण पसरले आहे.
पोलीस निरीक्षक रवींद्र खांडेकर यांच्या आशीर्वादाने तुळजापूरमध्ये मोठ्या प्रमाणात अवैध धंदे सुरू आहेत. सामाजिक कार्यकर्ते राजाभाऊ माने यांनी पोलीस अधीक्षक संजय जाधव यांना तुळजापुरात कोणत्या ठिकाणी अवैध धंदे सुरु आहेत, त्याचा कर्ताधर्ता कोण आहे, हे नावासहित निवेदन दिले आहे. परंतु याबाबत अद्याप कोणतीही कारवाई झाली आहे हे अत्यंत गंभीर आहे.
याप्रकरणी बातम्या देणाऱ्या पत्रकरांना देखील गुंडांकडून धमक्या दिल्या जात आहेत. गुंडगिरी करणारे छपरी लोक, अवैध धंदे करणारे लोक आणि पोलीस यांचे साटेलोटे सुरु आहे. पत्रकारांना धमक्या देणे हे अत्यंत निंदनीय कृत्य आहे. पत्रकारांना निर्भयपणे काम करण्याचा अधिकार आहे आणि पोलिसांनी त्यांचे संरक्षण करणे आवश्यक आहे.
राज्याचे मुख्यमंत्री आणि गृहमंत्री देवेन्द्र फडणवीस यांनी या प्रकरणी तातडीने लक्ष घालून कारवाई करावी. बीडसारखी घटना धाराशिव जिल्ह्यात झाल्यानंतर शासन पोलिसांवर कारवाई करणार आहे का ? असा सवाल आहे. पोलीस अधीक्षक संजय जाधव यांनी पोलीस निरीक्षक रवींद्र खांडेकर यांची तातडीने बदली करून त्यांच्यावर चौकशी करावी.
या प्रकरणी पुढील मुद्दे महत्त्वाचे आहेत:
- शेतकऱ्यांच्या जमिनीचे संरक्षण: शेतकऱ्यांच्या जमिनी त्यांच्या उदरनिर्वाहाचे प्रमुख साधन आहेत. त्यांच्या जमिनी हडप करण्याचे प्रकार थांबवणे आवश्यक आहे.
- पोलिसांची भूमिका: पोलिसांनी निष्पक्ष आणि पारदर्शीपणे काम करणे आवश्यक आहे. गुंडांना पाठीशी घालून शेतकऱ्यांवर अन्याय करणाऱ्या पोलिसांवर कारवाई करावी.
- पत्रकारांचे संरक्षण: पत्रकारांना निर्भयपणे काम करण्याचे वातावरण निर्माण करणे आवश्यक आहे.
- प्रशासनाची जबाबदारी: प्रशासनाने या प्रकरणी गांभीर्याने लक्ष घालून दोषींवर कारवाई करावी.
तुळजापूर हे आई तुळजाभवानी मातेचे तीर्थक्षेत्र आहे. या पवित्र ठिकाणी असे अन्यायकारक प्रकार घडणे अत्यंत दुर्दैवी आहे. शासनाने तातडीने या प्रकरणात लक्ष घालून शेतकऱ्यांना न्याय द्यावा.
