शिराढोण: कळंब तालुक्यातील पिंपरी येथे शेतरस्त्यावरून झालेल्या वादातून दुहेरी मारहाणीचा धक्कादायक प्रकार घडला आहे. याप्रकरणी शिराढोण पोलीस ठाण्यात दोन्ही बाजूंनी गुन्हे दाखल करण्यात आले आहेत.
दि. २५ डिसेंबर २०२४ रोजी दुपारी १२ वाजण्याच्या सुमारास पिंपरी येथील शेताजवळ बालाजी बळीराम राउत यांनी साहेबराव मारुती राउत यांना शेतरस्त्याच्या कारणावरून शिवीगाळ करून लाथाबुक्क्यांनी मारहाण केली. तसेच लोखंडी सळईने वार करून जखमी केले आणि जीवे मारण्याची धमकी दिली. याप्रकरणी साहेबराव राउत यांनी दिलेल्या फिर्यादीवरून बालाजी राउत यांच्याविरुद्ध भादंवि कलम ११८(१), ११५ (२), ३५२, ३५१(२) अन्वये गुन्हा दाखल करण्यात आला आहे.
त्याचवेळी दुसऱ्या एका घटनेत, बाळासाहेब महादेव राउत, साहेबराव महादेव राउत आणि दयानंद महादेव राउत या तिघांनी मिळून बालाजी बळीराम राउत यांना शेतरस्त्याच्या कारणावरून शिवीगाळ करून लाथाबुक्क्यांनी मारहाण केली. त्यांनीही लोखंडी सळईने वार करून बालाजी राउत यांना जखमी केले आणि जीवे मारण्याची धमकी दिली. या घटनेप्रकरणी बालाजी राउत यांनी दिलेल्या फिर्यादीवरून बाळासाहेब राउत, साहेबराव राउत आणि दयानंद राउत यांच्याविरुद्ध भादंवि कलम ११८(१), ११५ (२), ३५२, ३५१(२), ३(५) अन्वये गुन्हा दाखल करण्यात आला आहे.
पोलिसांनी दिलेल्या माहितीनुसार, दोन्ही गटांमध्ये पूर्वीपासून वाद सुरू होता. शेतरस्त्यावरून झालेल्या वादातून हा प्रकार घडला. पोलीस या प्रकरणाचा अधिक तपास करत आहेत.
