धाराशिव – गेल्या काही महिन्यांपासून पवनचक्की कंपन्यांकडून धाराशिव जिल्ह्यातील शेतकऱ्यांना विविध प्रकारे त्रास दिला जात असल्याच्या घटना उघडकीस येत आहेत. कराराने घेतलेल्या जमिनीच्या क्षेत्रापेक्षा जास्त जागा बळकावणे, शेतकऱ्यांना धमकावणे, बेकायदेशीररित्या रस्ते तयार करणे, परवानगीशिवाय जमिनीचा वापर करणे अशा प्रकारांनी शेतकऱ्यांमध्ये संतापाची लाट उसळली आहे.
उठत आहेत गंभीर प्रश्न
या प्रकरणांवर स्थानिक पातळीवर रोष असून काही गंभीर प्रश्न उपस्थित केले जात आहेत:
- कंपन्यांना मोगलाईचे समर्थन कोण करत आहे?
पवनचक्की कंपन्यांना इतक्या बेकायदेशीर कृत्यांसाठी नेमकं कोणाचं अभय मिळतंय? प्रशासन, पोलीस यांचं यात कोणत्या प्रमाणात सहकार्य आहे? - सरपंचावर हल्ल्याचा सूत्रधार कोण?
काही गावांत या कंपन्यांच्या लोकांकडून स्थानिक सरपंचांवर जीवघेणे हल्ले झाल्याचे प्रकार समोर आले आहेत. या गुन्हेगारांना संरक्षण कोण देत आहे, हा मोठा प्रश्न आहे. - लोकशाहीच्या मूल्यांना आव्हान:
या घटनांमुळे कायदा व सुव्यवस्थेची अवस्था खालावत आहे. प्रशासन आणि पोलीस विभागाच्या सहभागाशिवाय अशा घटना कशा घडू शकतात? - अकृषिक परवानग्यांचा सावळा गोंधळ:
पवनचक्की बसवण्यासाठी शेतीचे औद्योगिक वापरासाठी रूपांतर होते आहे. महसूल विभागाकडून या अकृषिक वापरासाठी परवानगी घेतली आहे का? की परवानगी न घेता बेकायदेशीर रित्या हे प्रकार सुरू आहेत?
शासनाचे मौन आश्चर्यकारक
या सर्व परिस्थितीत प्रशासन व संबंधित विभागांच्या भूमिकेवरही प्रश्नचिन्ह निर्माण झाले आहे. शेतकऱ्यांच्या जमिनी बळकावणाऱ्या कंपन्यांवर कठोर कारवाई होणार का, हा मोठा मुद्दा ठरतोय.
शेतकऱ्यांच्या हक्कांसाठी लढा अनिवार्य
शेतकऱ्यांनी एकत्र येऊन या अन्यायाविरुद्ध आवाज उठवणे आवश्यक झाले आहे. सरकारनेही तातडीने हस्तक्षेप करून शेतकऱ्यांना न्याय मिळवून द्यावा, अशी मागणी अण्णासाहेब दराडे यांनी केली आहे.
(तुमच्या प्रतिक्रिया व या विषयावरच्या अधिक माहितीसाठी आम्हाला कळवा.)
