धाराशिव : बस माझ्यासमोर का लावलीस या कारणावरुन एका प्रवाशास मारहाण करुन जीवे मारण्याची धमकी दिल्याप्रकरणी आरोपी बालाजी कापसे याच्याविरुद्ध गुन्हा दाखल करण्यात आला आहे. फकीर जाफर सय्यद (वय ५७, रा. पिंपरी आर ता. बाशी जि. सोलापूर) यांनी या प्रकरणी आनंदनगर पोलीस ठाण्यात फिर्याद दाखल केली आहे.
फिर्यादी सय्यद हे धाराशिव बसस्थानकावर ३० जानेवारी २०२५ रोजी दुपारी १ वाजून ५० मिनिटांनी बसची वाट पाहत उभे होते. त्यावेळी आरोपी बालाजी कापसे (रा. सारोळा ता. जि. धाराशिव) याने त्यांना ‘एस टी बस माझ्यासमोर का लावलीस’ असे म्हणून शिवीगाळ केली. कापसे याने सय्यद यांना लाथाबुक्यांनी व दगडाने मारहाण करून जखमी केले. तसेच, त्यांना जीवे ठार मारण्याची धमकीही दिली.
फिर्यादी फकीर सय्यद यांनी १ फेब्रुवारी २०२५ रोजी आनंदनगर पोलीस ठाण्यात या घटनेची तक्रार दाखल केली. पोलिसांनी आरोपी कापसेविरुद्ध भारतीय दंड संहिता कलम ११८ (१), ११५ (२), ३५२, ३५१ (२) (३) अन्वये गुन्हा दाखल केला आहे. या घटनेचा पुढील तपास आनंदनगर पोलीस करत आहेत.
