मावस भावाचा कोयत्याने वार करून खून करणाऱ्या नराधम आरोपीला जन्मठेपेची शिक्षा

धाराशिव – नात्यातील मुलीसोबत असलेले अनैतिक संबंध उघड केल्याच्या आणि मालमत्ता लिहून देण्यास भाग पाडल्याच्या रागातून सख्ख्या मावस भावाचा कोयत्याने पोटावर वार करून निर्घृण खून करणाऱ्या आरोपीला न्यायालयाने आजन्म कारावासाची (जन्मठेप) ठोस शिक्षा सुनावली आहे. धाराशिवच्या प्रमुख जिल्हा व सत्र न्यायाधीश श्रीमती अभिश्री देव  यांनी आज २९ जून २०२६ रोजी हा ऐतिहासिक निकाल दिला.

काय होते संपूर्ण प्रकरण?

पोलिसांच्या आणि न्यायालयीन नोंदीनुसार, मयत ज्ञानेश्वर नाना करंडे (रा. तुळजापूर) याला त्याचा मावस भाऊ आरोपी रामेश्वर संभाजी खोचरे याचे नात्यातील एका मुलीसोबत बेकायदेशीर व अनैतिक संबंध असल्याची माहिती मिळाली होती. ज्ञानेश्वरने कुटुंबियांच्या संमतीने आरोपी रामेश्वरला हे संबंध तातडीने बंद करण्यास सांगितले.

एवढेच नव्हे तर, आरोपीच्या या चुकीमुळे पीडित मुलीचे नुकसान भरपाई म्हणून आरोपी रामेश्वरच्या नावावर असलेला धाराशिव येथील एक प्लॉट तिला लिहून देण्यास भाग पाडले. या सगळ्या प्रकारामुळे नात्यात मोठी नाचक्की झाली आणि हा राग मनात धरून रामेश्वरने ज्ञानेश्वरचा काटा काढण्याचे ठरवले.

चेहऱ्याला रुमाल बांधून केला पाठलाग अन् हायवेवर केला खून

९ जून २०२२ रोजी दुपारी, आरोपी रामेश्वरने आपल्या चेहऱ्याला रुमाल बांधून तुळजापूर येथील ज्ञानेश्वरच्या झेरॉक्स दुकानासमोर पाळत (रेकी) ठेवली. सायंकाळी ५:३० वाजण्याच्या सुमारास ज्ञानेश्वर आपल्या स्कूटीवरून (MH 25 Z 7609) घराकडे निघाला असता, रामेश्वरने आपल्या डिस्कव्हर मोटरसायकलवरून (MH 25 Z 0545) त्याचा पाठलाग केला.

तुळजापूर ते सोलापूर रोडवरील सिंदफळ शिवारात काकाका धाब्याच्या पुढे हायवेच्या कडेला रामेश्वरने ज्ञानेश्वरला गाठले. तिथे त्याने धारदार लोखंडी कोयत्याने ज्ञानेश्वरच्या पोटावर आणि बरगडीवर सपासप वार केले. हा हल्ला इतका भयानक होता की, तो लोखंडी कोयता थेट ज्ञानेश्वरच्या पोटातच अडकून राहिला आणि ज्ञानेश्वरचा रक्ताच्या थारोळ्यात जागीच मृत्यू झाला. फिर्यादी भैरुनाथ नाना करंडे (मयाताचा भाऊ) यांना या घटनेची माहिती मिळताच त्यांनी तुळजापूर पोलीस ठाण्यात गुन्हा नोंदवला.

न्यायालयाने सुनावली कडक शिक्षा

तुळजापूर पोलिसांनी गुन्हा दाखल करून (गुरनं. २०९/२०२२) न्यायालयात भक्कम दोषारोपपत्र दाखल केले. या खटल्यात जिल्हा सरकारी वकील तथा शासकीय अभियोक्ता महेंद्र बी. देशमुख यांनी सरकार पक्षातर्फे मजबूत युक्तिवाद केला आणि एकूण ०९ साक्षीदारांची साक्ष नोंदवली. घटनास्थळावरील रक्ताचे नमुने आणि आरोपीच्या हालचाली दर्शवणारे सीसीटीव्ही (CCTV) फुटेज न्यायालयात भक्कम पुरावा ठरले.

दोन्ही बाजूंचा युक्तिवाद ऐकल्यानंतर प्रमुख जिल्हा व सत्र न्यायाधीश श्रीमती अभिश्री देव  यांनी आरोपी रामेश्वर संभाजी खोचरे याला भारतीय दंड विधान (IPC) कलम ३०२ अंतर्गत दोषी ठरवून खालीलप्रमाणे शिक्षा सुनावली:

• मुख्य शिक्षा: जन्मठेप (आजन्म कारावास).

• आर्थिक दंड: २५,००० रुपये दंड, आणि दंड न भरल्यास अतिरिक्त ०६ महिने साधी कैद.

 सदर गुन्ह्याचा सखोल तपास तुळजापूर पोलीस ठाण्याचे तत्कालीन पो.नी. ए.व्ही. काशिद यांनी केला होता. तसेच हा खटला न्यायालयात तडीस नेण्यासाठी कोर्ट पैरवी म्हणून पोलीस हेड कॉन्स्टेबल (ब.नं. १३६०)  एम.टी. पाटोळे यांनी मोलाची भूमिका बजावली.