उमरगा: लग्नाचे खोटे आमिष दाखवून एका २४ वर्षीय तरुणीला शेतात नेऊन तिच्यावर लैंगिक अत्याचार केल्याची घटना उमरगा पोलीस ठाण्याच्या हद्दीत उघडकीस आली आहे. याप्रकरणी पीडित तरुणीच्या तक्रारीवरून उमरगा पोलीस ठाण्यात गुन्हा दाखल करण्यात आला आहे.
शेतात नेऊन केला अत्याचार
पोलिसांकडून मिळालेल्या माहितीनुसार, पीडित २४ वर्षीय तरुणी आणि आरोपी तरुण हे एकाच परिसरातील रहिवासी आहेत. मे २०२६ ते २३ जून २०२६ दरम्यान आरोपी तरुणाने पीडितेला “मी तुझ्याशी लग्न करेन” असे खोटे आमिष दाखवले आणि तिच्यावर दबाव निर्माण केला. २३ जून रोजी पहाटे ५:०० वाजण्याच्या सुमारास आरोपीने तिला एका गावातील शेतात नेले आणि तिच्या इच्छेविरुद्ध तिथे तिच्यावर लैंगिक अत्याचार केला.
फसवणूक झाल्याचे लक्षात येताच पोलिसांत धाव
आरोपीने लग्नास नकार दिल्यानंतर आपली फसवणूक झाल्याचे पीडितेच्या लक्षात आले. तिने ३० जून २०२६ रोजी उमरगा पोलीस ठाणे गाठून नराधम तरुणाविरुद्ध फिर्याद दिली. तिच्या प्रथम खबरीवरून पोलिसांनी आरोपीविरुद्ध भारतीय न्याय संहिता (BNS) कलम ६९ (लग्नाचे खोटे प्रलोभन दाखवून किंवा फसवणूक करून लैंगिक संबंध ठेवणे) अन्वये गुन्हा नोंदवला आहे. उमरगा पोलीस या प्रकरणाचा पुढील तपास करत असून आरोपीचा शोध सुरू आहे.
(पीडितेच्या सुरक्षिततेसाठी तिचे नाव व गाव गोपनीय ठेवण्यात आले आहे)
