परंडा: रस्त्यावरून जाण्याच्या आणि मोटारसायकल मागे घेण्याच्या क्षुल्लक कारणावरून दोन गटांत तुंबळ हाणामारी झाल्याची घटना परंडा तालुक्यातील साकत बुद्रुक येथे घडली आहे. या घटनेत दोन्ही गटांनी एकमेकांना लाथाबुक्क्यांनी, काठी आणि दगडाने बेदम मारहाण केली असून, याप्रकरणी परंडा पोलीस ठाण्यात दोन्ही गटांच्या एकूण १० जणांवर परस्परविरोधी गुन्हे दाखल करण्यात आले आहेत. ही घटना १६ फेब्रुवारी रोजी घडली असून, २१ फेब्रुवारी रोजी पोलिसांत नोंद झाली आहे.
पहिला गट: रस्त्यावरून जाण्याच्या कारणावरून मारहाण
गणेश हनुमंत जाधव (वय २६, रा. साकत बु.) यांनी दिलेल्या फिर्यादीनुसार, १६ फेब्रुवारी रोजी सकाळी १०.०० वाजेच्या सुमारास पंडित फरताडे यांच्या किराणा दुकानासमोर रस्त्यावरून जाण्याच्या कारणावरून वाद झाला. यावेळी आरोपी अरुण नरसिंह सावंत, अक्षय अरुण सावंत, शहाजी सावंत, पिंटू सावंत आणि संतोष सावंत (सर्व रा. साकत बु.) यांनी गैरकायद्याची मंडळी जमवून त्यांना शिवीगाळ केली. तसेच लाथाबुक्क्यांनी आणि दगडाने मारहाण करून जखमी केले. भांडण सोडवण्यासाठी आलेल्या गणेश यांच्या मित्रालाही आरोपींनी मारहाण करून बघून घेण्याची धमकी दिली. या फिर्यादीवरून ५ जणांवर गुन्हा दाखल करण्यात आला आहे.
दुसरा गट (क्रॉस फिर्याद): मोटारसायकल मागे घेण्यावरून वाद
याच घटनेत अरुण नरसिंह सावंत (वय ५२, रा. साकत बु.) यांनी परस्परविरोधी (क्रॉस) फिर्याद दिली आहे. त्यानुसार, सकाळी १०.३० वाजेच्या सुमारास त्याच ठिकाणी मोटारसायकल मागे घेण्याच्या कारणावरून आरोपी गणेश हनुमंत जाधव, मोहन देवकर, बिरुदेव सावंत (सर्व रा. साकत बु.), प्रशांत एडबा शिंदे आणि बाळू एडबा शिंदे (दोघे रा. साकत पूर्व) यांनी बेकायदेशीर जमाव जमवून अरुण सावंत यांना शिवीगाळ केली. तसेच लाथाबुक्क्यांनी, काठी व दगडाने बेदम मारहाण करून जखमी केले. यावेळी अरुण यांचा मुलगा अक्षय आणि पुतण्या पिंटू हे भांडण सोडवण्यासाठी आले असता, त्यांनाही आरोपींनी मारहाण केली. या फिर्यादीवरून ५ जणांवर गुन्हा नोंदवण्यात आला आहे.
दोन्ही गटांनी २१ फेब्रुवारी २०२६ रोजी दिलेल्या प्रथम खबरेवरून, परंडा पोलीस ठाण्यात भारतीय न्याय संहिता (भा.न्या.सं.) कलम ११८(१), ११५(२), ३५२, १८९(२), १९१(२), १९१(३) आणि १९० अन्वये परस्परविरोधी गुन्हे दाखल करण्यात आले आहेत. या प्रकरणाचा अधिक तपास परंडा पोलीस करत आहेत.
