तुळजापूर: श्री तुळजापूर तीर्थक्षेत्र विकास आराखड्याचे काम सुरू होण्यापूर्वीच मंदिर परिसरातील २० उपदेवतांच्या मूर्ती हलवताना प्राचीन श्री ब्रह्मदेवाची मूर्ती निष्काळजीपणामुळे दुभंगली आहे, असा आरोप करत महाराष्ट्र मंदिर महासंघाने यास जबाबदार असणाऱ्या शासकीय अधिकाऱ्यांवर तात्काळ गुन्हे दाखल करावेत, अशी मागणी केली आहे. अडीच महिन्यांपूर्वी तक्रार करूनही अद्याप कोणतीही कारवाई न झाल्याने महासंघाने पत्रकार परिषद घेऊन तीव्र नाराजी व्यक्त केली.
महाराष्ट्र मंदिर महासंघाचे राष्ट्रीय संघटक सुनील घनवट यांनी पत्रकार परिषदेत ही मागणी केली. यावेळी हिंदू जनजागृती समिती, पाळेकर पुजारी मंडळ, महंत मंडळ, परमेश्वर भोपे पुजारी मंडळ, हिंदू राष्ट्र सेना आणि श्री शिवप्रतिष्ठान हिंदुस्थान यांचे प्रतिनिधी उपस्थित होते.
श्री. घनवट यांनी सांगितले की, मूर्ती हलवताना ती दुभंगली असून, ती पूर्वीपासूनच भंगलेली होती हा दावा खोटा आणि दिशाभूल करणारा आहे. मूर्ती पूर्वी अखंड असल्याचे पुरावे उपलब्ध असून, या प्रकरणाची सखोल चौकशी करून दोषींवर फौजदारी कारवाई झालीच पाहिजे, असे ते म्हणाले.
विकास आराखड्यावरही अनेक गंभीर आक्षेप नोंदवण्यात आले.
- मंदिरातील अनादी काळापासून चालत आलेले कुलाचार, वंशपरंपरा आणि धार्मिक विधींसाठी आराखड्यात कोणतीही जागा राखीव ठेवण्यात आलेली नाही, हे हिंदूंच्या श्रद्धेवरील आघात आहे.
- मुख्य गाभाऱ्यातील सभामंडपाला तडे गेले असून त्याचा जीर्णोद्धार केला जाणार आहे. मात्र, मंदिराच्या मूळ ऐतिहासिक, धार्मिक आणि वास्तुरचनेला धक्का लागणार नाही, याची शासनाने खात्री द्यावी.
- विकास आराखड्यात पारदर्शकता आणून त्याचे लेखी दस्तऐवज जाहीर करावेत.
- आराखड्याला अंतिम स्वरूप देण्यापूर्वी धर्मशास्त्राचे अभ्यासक, धर्माचार्य आणि शंकराचार्य पिठांचे मत विचारात घ्यावे.
- मंदिराचे मुख्य प्रवेशद्वार पूर्वीप्रमाणेच ठेवून, मागून नवीन दार काढून मंदिराच्या मूळ रचनेत बदल करू नये.
या सर्व मुद्द्यांवर चर्चा करण्यासाठी श्री तुळजापूर संरक्षण कृती समिती, महाराष्ट्र मंदिर महासंघ, हिंदुत्वनिष्ठ संघटना, पुजारी मंडळे आणि स्थानिक ग्रामस्थ यांची जिल्हाधिकारी व पालकमंत्र्यांनी तातडीने बैठक बोलवावी, अशी ठाम मागणीही यावेळी उपस्थित सर्व संघटनांनी केली.
