तुळजापूर: तुळजाभवानी मंदिरात नव्याने नियुक्त करण्यात आलेल्या जनसंपर्क अधिकाऱ्यावर गंभीर गुन्हा दाखल असल्याचे उघडकीस आल्याने, गणेश ज्ञानोबा निरवड यांना तातडीने कार्यमुक्त करण्यात आले आहे. मंदिर संस्थानाने त्यांना गतवर्षी १४ सप्टेंबर रोजी नियुक्ती दिली होती आणि ८ जुलै रोजी त्यांना कार्यमुक्त केले यामुळे त्यांची कारकीर्द केवळ १० महिन्यांची ठरली आहे.
गतवर्षी सप्टेंबर महिन्यात झालेल्या कर्मचारी भरतीवेळी, निवड झालेल्या सर्व कर्मचाऱ्यांना सहा महिन्यांच्या आत वैद्यकीय व चारित्र्य प्रमाणपत्र सादर करणे बंधनकारक करण्यात आले होते. मंदिरातील इतर सर्व नवनियुक्त कर्मचाऱ्यांनी ही प्रमाणपत्रे वेळेत सादर केली. मात्र, निरवड हे सदर प्रमाणपत्र सादर करण्यास टाळाटाळ करत होते. कर्मचाऱ्यांच्या ग्रुपवर वेळोवेळी सूचना देऊनही त्यांनी प्रमाणपत्र सादर करण्यास विलंब केला. अखेरीस, मंदिर संस्थानने त्यांना कारणे दाखवा नोटीस बजावली. त्यानंतर त्यांनी प्रमाणपत्र सादर केले. याच प्रमाणपत्रातून त्यांच्यावर गंभीर गुन्हा दाखल असल्याचे आढळल्याने मंदिर संस्थानाने त्यांना तातडीने पदमुक्त करत असल्याचे कळवले.
या घटनेमुळे तब्बल ३३ वर्षांनंतर झालेली मंदिर भरती प्रक्रिया पुन्हा एकदा चर्चेत आली आहे, यापूर्वी १९९१ साली मंदिरात कर्मचारी भरती झाली होती. गतवर्षी विविध ५८ जागांसाठी ही भरती प्रक्रिया राबवण्यात आली होती. दरम्यान, अटी आणि शर्तींनुसार संबंधित कर्मचाऱ्याची बँक गॅरंटी मंदिर संस्थानकडे जमा असल्याचे सांगण्यात आले आहे.
