धाराशिव : शिवसेनेला ‘जय महाराष्ट्र’ करत भाजपमध्ये जाहीर प्रवेश केलेले माजी जिल्हा परिषद उपाध्यक्ष धनंजय सावंत यांच्या गाडीचा सोलापूर–पुणे महामार्गावर भीषण अपघात झाला. गुरुवारी मध्यरात्री भिगवणजवळील डाळज (ता. इंदापूर) परिसरात भरधाव कंटेनरने त्यांच्या फॉर्च्युनर कारला जोरदार धडक दिली. या अपघातात कारचा मोठा चक्काचूर झाला असला तरी सावंत यांच्यासह त्यांच्या सहकाऱ्यांचा थोडक्यात बचाव झाला.
मिळालेल्या माहितीनुसार, मुंबई येथे भाजप प्रदेशाध्यक्ष रवींद्र चव्हाण आणि आमदार राणाजगजीतसिंह पाटील यांच्या उपस्थितीत धनंजय सावंत यांनी कुटुंबीय व कार्यकर्त्यांसह भाजपमध्ये प्रवेश केला होता. कार्यक्रमानंतर ते फॉर्च्युनर कारने धाराशिवकडे परतत होते. मध्यरात्रीच्या सुमारास भिगवणजवळ मागून येणाऱ्या भरधाव कंटेनरने त्यांच्या गाडीला चालकाच्या बाजूने जोरदार धडक दिली.
अपघात इतका भीषण होता की, कारच्या ड्रायव्हर साईडचा पूर्ण भाग उद्ध्वस्त झाला. धडकेनंतर गाडी रस्त्याच्या कडेला फेकली गेली. मात्र एअरबॅग्ज उघडल्याने आणि नशिबाची साथ मिळाल्याने धनंजय सावंत यांना गंभीर दुखापत झाली नाही. चालक आणि अंगरक्षक किरकोळ जखमी झाले असून त्यांच्यावर जवळच्या रुग्णालयात उपचार करण्यात आले.
धनंजय सावंत हे शिवसेना आमदार तानाजी सावंत यांचे पुतणे आहेत. त्यांच्या भाजप प्रवेशामुळे धाराशिवच्या राजकारणात आधीच खळबळ उडाली होती. त्यातच या अपघाताची बातमी समोर आल्याने कार्यकर्त्यांमध्ये चिंतेचे वातावरण निर्माण झाले. मात्र सावंत सुरक्षित असल्याची माहिती मिळताच समर्थकांनी सुटकेचा निश्वास सोडला आहे.
“कार्यकर्त्यांचे प्रेम, शुभेच्छा आणि ईश्वराची कृपा यामुळेच मी या भीषण संकटातून सुखरूप बाहेर आलो आहे. प्रकृती स्थिर असून कुणीही काळजी करू नये.”
— धनंजय सावंत (माजी उपाध्यक्ष, जिल्हा परिषद)
