धाराशिव – वाचकहो, कृपया गैरसमज करून घेऊ नका. ही पैशांची बँक नाही, ही आहे चुकांची बँक! धाराशिवच्या राजकारणात एका नव्या ‘वित्तीय’ संस्थेची जोरदार चर्चा आहे, जिचे नाव आहे – ‘ब्लंडर बँक’.
हा एक व्यंगात्मक शब्दप्रयोग आहे, ज्याचा उद्देश आहे:
- ब्लंडर (Blunder): म्हणजे मोठी चूक, गडबड किंवा मूर्खपणाची कृती.
- बँक (Bank): म्हणजे संग्रह करण्याची जागा.
थोडक्यात, राजकीय चुका, घोटाळे आणि मूर्खपणाच्या कृतींचा संग्रह करणारी ही एक काल्पनिक बँक आहे, जी सध्या खासदार ओमराजे निंबाळकर यांच्याविरोधात नवनवीन ‘ब्लंडर’ म्हणजेच चुका ‘डिपॉझिट’ करत आहे.
‘ब्लंडर बँके’च्या नव्या ‘गुंतवणुकी’मागे ‘खुन्नस’चे कारण?
सूत्रांच्या माहितीनुसार, या डिजिटल बदनामी मोहिमेची ‘स्क्रिप्ट’ थेट दिल्लीतून आली आहे. नुकत्याच झालेल्या उपराष्ट्रपतीपदाच्या निवडणुकीत ‘इंडिया’ आघाडीची काही मते फुटली होती, ज्यात ठाकरे गटाचेही खासदार असल्याचा दावा केला गेला. याच ‘स्क्रिप्ट’वर आधारित, खासदार ओमराजे यांच्याविषयी संभ्रम निर्माण करून त्यांना बदनाम करण्याचा हा ‘लोकल’ प्रयत्न असल्याचे बोलले जात आहे.
या ‘बँके’ने नुकताच “आम्हाला कळालं” नावाचा एक ‘ब्लंडर’ केला आहे.मात्र, हा डाव त्यांच्यावरच उलटताना दिसत आहे. या बँकेचे ‘अघोषित चेअरमन’ म्हणून भाजप आमदार राणा पाटील यांचे चिरंजीव मल्हार पाटील यांचे नाव घेतले जात आहे. लोकसभा निवडणुकीत ओमराजेंनी राणा पाटलांच्या पत्नीचा तब्बल साडेतीन लाख मतांनी केलेला पराभव, हेच या बँकेच्या स्थापनेमागील मुख्य कारण असल्याची चर्चा आहे.
ओमराजेंनी लोकसभा निवडणुकीत पाटील कुटुंबाच्या राजकीय भूमिकेवरही टीका केली होती. “नवरा भाजपमध्ये, बायको राष्ट्रवादीमध्ये, मुलगा शिंदे गटात” या त्यांच्या टीकेने पाटील कुटुंब चांगलेच अडचणीत आले होते.
फ्लॅशबॅक: जेव्हा ‘बडवीन’चा ‘चेक’ बाऊन्स झाला!
या ‘ब्लंडर बँके’चा ताळेबंद (Balance Sheet) आधीपासूनच गडबडलेला आहे. काही दिवसांपूर्वी गणेश विसर्जन मिरवणुकीत, बँकेच्या काही उत्साही ‘कर्मचाऱ्यांनी’ खासदार ओमराजेंना डिवचण्याचा प्रयत्न केला होता. ओमराजेंना पाहताच, “ढोलकीला बांधून तुला बदा बदा बडवीन” या गाण्यावर दंड थोपटत एक ‘रील’ तयार करण्यात आली. पण त्यांच्या या आक्रमक कृतीवर ओमराजेंनी केवळ एक स्मितहास्य दिले आणि हा ‘चेक’ जागेवरच ‘बाऊन्स’ झाला. परिणामी, हा प्रयत्न त्यांच्याच खात्यात एक मोठा ‘ब्लंडर’ म्हणून जमा झाला.
ठाकरे गटाकडून ‘बँके’चे ‘ऑडिट’
‘ब्लंडर बँके’च्या या नव्या ‘डिपॉझिट’ला ठाकरे गटाने थेट “बालबुद्धी” असे ‘सर्टिफिकेट’ दिले आहे. बँकेच्या पतनावर (Credit Rating) प्रश्नचिन्ह निर्माण करत, ठाकरे गटाचे शहर प्रमुख सोमनाथ गुरव यांनी बँकेच्या ‘प्रमोटर्स’चा जुना हिशोबच मांडला. ते म्हणाले, “ज्या राणा पाटलांना साधं ग्रामपंचायत सदस्य नसताना शरद पवारांनी थेट राज्यमंत्री बनवलं, त्याच पवारांना धोका देऊन ते भाजपमध्ये गेले. हा त्यांच्या कारकिर्दीतील सर्वात मोठा ‘ब्लंडर‘ आहे आणि तो जिल्ह्याला माहीत आहे.”
थोडक्यात काय तर…
जिल्हा परिषद आणि नगरपालिका निवडणुका तोंडावर आल्याने, धाराशिवची ‘ब्लंडर बँक’ नवनवीन चुकांची ‘गुंतवणूक’ करत आहे. एका बाजूला मल्हार पाटलांच्या नेतृत्वात चाललेली ही ‘बँक’ आणि दुसऱ्या बाजूला ओमराजेंचा शांत पण तितकाच भेदक संयम. आता या बँकेचा ताळेबंद निवडणुकीपूर्वी नफ्यात येतो, की स्वतःच्याच चुकांच्या कर्जात बुडून ‘दिवाळखोरी’ जाहीर करते, हे पाहणे धाराशिवच्या जनतेसाठी एक मनोरंजक कार्यक्रम ठरणार आहे!
