उमरगा : देवदर्शन करून गावी परतणाऱ्या दाम्पत्याची गाडी अडवून, ‘गाडीचा हॉर्न का वाजवला?’ अशी कुरापत काढत पतीला लोखंडी गजाने बेदम मारहाण करून लुटल्याची धक्कादायक घटना उमरगा चौरस्ता येथे घडली. या घटनेत अज्ञात लुटारूंनी रोख रकमेसह ४७ हजार २०० रुपयांचा ऐवज बळजबरीने पळवला असून, याप्रकरणी उमरगा पोलिस ठाण्यात गुन्हा दाखल करण्यात आला आहे.
पोलिसांनी दिलेल्या सविस्तर माहितीनुसार, धाराशिव जिल्ह्यातील बेंबळी येथील रहिवासी तस्लीम आरेफ पठाण (वय २८) आणि त्यांचे पती हे गुलबर्गा येथून देवदर्शन आटोपून आपल्या गाडीने बेंबळीकडे परत येत होते. रविवारी (ता. २४) मध्यरात्री साडेबारा वाजेच्या सुमारास त्यांची गाडी उमरगा चौरस्ता येथे आली असता, दोन मोटारसायकलवरून आलेल्या काही अज्ञात इसमांनी त्यांच्या गाडीसमोर दुचाकी आडव्या लावून त्यांचा रस्ता अडवला.
‘तुम्ही गाडीचा हॉर्न का वाजवला?’ असा जाब विचारत या अज्ञात इसमांनी तस्लीम यांच्या पतीला गाडीबाहेर ओढले. तसेच त्यांना चापटांनी आणि लोखंडी गजाने जबर मारहाण केली. यानंतर आरोपींनी त्यांच्याजवळील १७ हजार २०० रुपयांची रोख रक्कम आणि एक तोळ्याची सोन्याची साखळी असा एकूण ४७ हजार २०० रुपये किमतीचा ऐवज बळजबरीने हिसकावून तेथून पोबारा केला.
या अनपेक्षित प्रकारामुळे घाबरलेल्या तस्लीम पठाण यांनी रविवारी (ता. २४) उमरगा पोलिस ठाण्यात धाव घेत फिर्याद दिली. या प्रथम खबरेवरून उमरगा पोलिसांनी अज्ञात आरोपींविरुद्ध भारतीय न्याय संहिता (भा.न्या.सं.) कलम ३०९(६), ३(५) अन्वये गुन्हा नोंदवला आहे. भररस्त्यात घडलेल्या या लुटीच्या घटनेमुळे प्रवाशांमध्ये भीतीचे वातावरण निर्माण झाले असून, उमरगा पोलिस या अज्ञात लुटारूंचा कसून शोध घेत आहेत.
