धाराशिव: तुळजापूर तालुक्यातील एका तरुणाला आणि त्याच्या मामभावाला खामसवाडी (ता. धाराशिव) येथे गैरकायद्याची मंडळी जमवून जातीवाचक शिवीगाळ करत लाथाबुक्क्यांनी व दगडाने बेदम मारहाण केल्याची घटना मंगळवारी (ता. २८) रात्री साडेदहा वाजेच्या सुमारास घडली. या मारहाणीत दोघे जखमी झाले असून, याप्रकरणी बेंबळी पोलिस ठाण्यात आठ जणांविरुद्ध ॲट्रॉसिटी आणि भारतीय न्याय संहितेनुसार (BNS) गुन्हा दाखल करण्यात आला आहे.
पोलिसांनी दिलेल्या माहितीनुसार, याप्रकरणी अमर सतीश सोनवणे (वय २५, रा. कात्री, ता. तुळजापूर, जि. धाराशिव) यांनी फिर्याद दिली आहे. अमर सोनवणे आणि त्यांचे मामभाऊ दत्ता अवधुते हे मंगळवारी (ता. २८) रात्री २२.३० वाजेच्या सुमारास खामसवाडी येथे असताना आरोपींनी गैरकायद्याची मंडळी जमवून त्यांना गाठले. यावेळी आरोपींनी त्यांना जातीवाचक शिवीगाळ करत लाथाबुक्क्यांनी व दगडाने मारहाण केली. या मारहाणीत दोघेही जखमी झाले आहेत. तसेच, आरोपींनी घराच्या पत्र्यावर दगड मारून नुकसानही केले.
या प्रकारानंतर अमर सोनवणे यांनी बुधवारी (ता. २९) बेंबळी पोलिस ठाण्यात धाव घेत तक्रार दिली. त्यांनी दिलेल्या प्रथम खबरीवरून खंडू बापू गुळवे, रणजित सुरेश गुळवे, महेश वैजिनाथ गुळवे, बालाजी अरुण गुळवे, यश ज्ञानेश्वर गुळवे, नागेश ज्ञानेश्वर गुळवे, सोमनाथ भोसले आणि राजेंद्र सुभाष गुळवे (सर्व रा. खामसवाडी, ता. जि. धाराशिव) या आठ जणांविरुद्ध बेंबळी पोलिस ठाण्यात भा.न्या.सं. कलम ११८(१), ११५(२), ३५२, ३३३, ३२४(४), १८९, १९०, १९१ सह अनुसूचित जाती-जमाती अत्याचार प्रतिबंधक कायदा (ॲट्रॉसिटी) कलम ३(१)(आर) आणि ३(१)(एस) अन्वये गुन्हा नोंदवण्यात आला आहे. या घटनेचा पुढील तपास बेंबळी पोलिस करत आहेत.
