धाराशिव – स्थानिक गुन्हे शाखा कार्यालयाला मिळालेल्या गुप्त माहितीच्या आधारे, पोलीस ठाणे ढोकी येथील घरफोडीच्या गुन्ह्यातील दोन फरार आरोपींना अटक करण्यात आली आहे. सुनिल उर्फ काळ्या श्रावण शिंदे आणि कृष्णा श्रावण शिंदे अशी अटक केलेल्या आरोपींची नावे आहेत.
पोलिसांनी दिलेल्या माहितीनुसार, हे दोन्ही आरोपी धारासुर मर्दिनी मंदिर परिसरात लपून बसले होते. गुप्त बातमी मिळताच पोलीस निरीक्षक वासुदेव मोरे यांच्या मार्गदर्शनाखाली सपोनि सुदर्शन कासार यांच्या नेतृत्वाखालील पथकाने त्वरित कारवाई करत दोन्ही आरोपींना पकडले.
चौकशी दरम्यान, आरोपींनी धाराशिव, सोलापूर आणि लातूर जिल्ह्यात अनेक घरफोडी आणि चोऱ्या केल्याची कबुली दिली आहे. त्यांच्याकडून एकूण 1,20,100 रुपये किमतीचा मुद्देमाल जप्त करण्यात आला आहे. तसेच, हे दोन्ही आरोपी धाराशिव शहर, सोलापूर, लातुर आणि बीड जिल्ह्यातील एकूण 32 गुन्ह्यांमध्ये वांछित होते. सध्या दोन्ही आरोपींना पोलीस ठाणे ढोकीच्या ताब्यात देण्यात आले असून, पोलिसांनी इतर फरार आरोपींचा शोध सुरू केला आहे.
