धाराशिव: जिल्ह्यात भुरट्या चोऱ्या आणि घरफोडीच्या घटनांमध्ये वाढ झाली असून, २० फेब्रुवारी रोजी जिल्ह्यातील वेगवेगळ्या पोलीस ठाण्यांत चोरीचे चार गुन्हे दाखल करण्यात आले आहेत. ढोकी, भूम, परंडा आणि धाराशिव शहर पोलीस ठाण्याच्या हद्दीत या घटना घडल्या असून, रोख रक्कमेसह सोन्याचे दागिने, दुचाकी आणि लॅपटॉप असा एकूण सुमारे साडेचार लाख रुपयांचा मुद्देमाल अज्ञात चोरट्यांनी लंपास केला आहे.
भूम: भरदिवसा घरफोडीत ३ लाख २२ हजारांची रोकड पळवली
भूम तालुक्यातील पाटसांगवी येथे भरदिवसा घरफोडीची मोठी घटना घडली. वैभव हरिदास नायकिंदे (वय ३३ वर्षे) यांचे घर बंद असताना १९ फेब्रुवारी रोजी दुपारी पावणेतीन ते सव्वाचार वाजेच्या दरम्यान अज्ञात चोरट्यांनी घराचा कडी-कोंडा तोडून आत प्रवेश केला. घरातील लोखंडी कपाटात ठेवलेली तब्बल ३,२२,००० रुपयांची रोख रक्कम चोरून नेली. या प्रकरणी भूम पोलीस ठाण्यात भा.न्या.सं. कलम ३३१(३), ३०५ अन्वये गुन्हा नोंदवण्यात आला आहे.
ढोकी: कोळेवाडीत वृद्धेच्या घरातून ५१ हजारांचे दागिने चोरीला
ढोकी पोलीस ठाण्याच्या हद्दीतील कोळेवाडी येथे राहणाऱ्या सरुबाई भारत इंगळे (वय ६६ वर्षे) यांच्या घरात चोरी झाली. १८ फेब्रुवारीच्या रात्री ९ ते १९ फेब्रुवारीच्या सकाळी साडेसहा वाजेच्या दरम्यान अज्ञात व्यक्तीने त्यांच्या घराचा दरवाजा ढकलून आत प्रवेश केला. घरातील पेटीत ठेवलेले साडेपंधरा ग्रॅम वजनाचे आणि ५१,००० रुपये किमतीचे सोन्याचे दागिने चोरून नेले. याप्रकरणी भा.न्या.सं. कलम ३०५(अ) नुसार गुन्हा दाखल करण्यात आला आहे.
येरमाळा (परंडा पो. ठाणे): पेट्रोलपंपावरून दुचाकीची चोरी
येडशी येथील रहिवासी तानाजी लक्ष्मण नागटिळक (वय ५३ वर्षे) यांची काळ्या रंगाची लाल पट्टा असलेली एचएफ डिलक्स मोटरसायकल (MH 25 AH 4649) चोरीला गेली. ११ फेब्रुवारीच्या रात्री १० ते ११ वाजेच्या सुमारास येरमाळा येथील भारत पेट्रोलपंपाजवळून अज्ञात व्यक्तीने अंदाजे ४०,००० रुपये किमतीची ही दुचाकी पळवली. याप्रकरणी परंडा पोलिसांत भा.न्या.सं. कलम ३०३(२) अन्वये गुन्हा दाखल झाला आहे.
धाराशिव शहर: ओम नगरमधून ३० हजारांचा लॅपटॉप चोरीला
मूळचे घाटपिंपरी (ता. आष्टी, जि. बीड) येथील रहिवासी असलेले आणि सध्या धाराशिव शहरातील ओम नगर येथे मातोळे यांच्या घरी राहणारे साई लक्ष्मण तळेकर (वय १९ वर्षे) यांचा लॅपटॉप चोरीला गेला आहे. १९ फेब्रुवारी रोजी सायंकाळी ५ ते रात्री साडेदहा वाजेच्या दरम्यान अज्ञात व्यक्तीने त्यांच्या घरातून ३०,००० रुपये किमतीचा ‘असुस टफ’ (Asus TUF) कंपनीचा काळ्या रंगाचा लॅपटॉप चोरून नेला. या प्रकरणी धाराशिव शहर पोलीस ठाण्यात भा.न्या.सं. कलम ३०३(२) अन्वये गुन्हा नोंदवण्यात आला आहे.
जिल्ह्यात वाढत्या चोरीच्या घटनांमुळे नागरिकांमध्ये चिंतेचे वातावरण असून, पोलीस या सर्व प्रकरणांचा कसून तपास करत आहेत.
