धाराशिव जिल्ह्यात चोरीचे सत्र; २५ लाखांचा टँकर, सव्वा लाखांच्या म्हशी, सोयाबीन अन् रोख रकमेसह लाखोंचा मुद्देमाल लंपास

धाराशिव : जिल्ह्यात भुरट्या चोरांसह मोठ्या टोळ्यांचा सुळसुळाट वाढला असून, तुळजापूर, उमरगा, वाशी आणि धाराशिव शहर व ग्रामीण परिसरात चोरीच्या ६ वेगवेगळ्या घटना उघडकीस आल्या आहेत. चोरांनी चक्क २५ लाखांचा टँकर, हॉटेल आणि घर फोडून रोकड, शेतातील म्हशी, दुचाकी तसेच मंगल कार्यालयातून महिलांची पर्स असा लाखोंचा ऐवज लांबवला आहे. या सर्व प्रकरणांत २४ फेब्रुवारी २०२६ रोजी संबंधित पोलीस ठाण्यांत भारतीय न्याय संहिता (BNS) अन्वये गुन्हे दाखल करण्यात आले आहेत.

• उमरगा: २५ लाखांचा टँकर पळवला

  हैदराबाद येथील एम. व्यंकटेश्वरलु मैदम (वय ४०) यांचा अंदाजे २५ लाख रुपये किमतीचा पांढऱ्या रंगाचा टँकर (TS UH 4077) २३ फेब्रुवारीच्या रात्री उमरगा येथील जकेकुर शिवारातील ‘जयभवानी ढाब्या’समोरून अज्ञात व्यक्तीने चोरून नेला. याप्रकरणी उमरगा पोलिसांत गुन्हा दाखल करण्यात आला आहे.

• तुळजापूर: हॉटेल फोडून लाखाची रोकड लंपास

  तीर्थ बुद्रुक (ता. तुळजापूर) येथील आप्पाराव धर्मसाले (वय ३७) यांच्या ‘इंद्रकृष्ण’ नावाच्या हॉटेलचे शटर तोडून चोरांनी गल्ल्यातील १ लाख रुपयांची रोकड आणि ५ हजारांचा मोबाईल असा एकूण १ लाख ५ हजारांचा ऐवज चोरून नेला. हा प्रकार २१ ते २२ फेब्रुवारी दरम्यान घडला असून तुळजापूर पोलिसांत गुन्हा नोंदवण्यात आला आहे.

• तुळजापूर: मंगल कार्यालयातून ८६ हजारांची चोरी

  तुळजापूर येथील अनिल कांबळे (वय ५५) हे सपत्नीक नळदुर्ग रोडवरील श्रीनाथ मंगल कार्यालयात लग्नासाठी गेले होते. यावेळी गर्दीचा फायदा घेत अज्ञाताने त्यांच्या पत्नीच्या पर्समधील ७० हजार रुपयांची रोकड आणि २ मोबाईल असा एकूण ८६ हजारांचा ऐवज लांबवला.

• धाराशिव ग्रामीण: शेतातून सव्वा लाखांच्या दोन म्हशी चोरीला

  येडशी (ता. धाराशिव) येथील मारुती ज्ञानदेव देवकर (वय ६७) यांच्या गट क्र. ३५२ मधील शेतातून अज्ञात चोरांनी तब्बल १ लाख २५ हजार रुपये किमतीच्या दोन म्हशी चोरून नेल्या. ही घटना १६ ते १७ फेब्रुवारीच्या दरम्यान घडली असून धाराशिव ग्रामीण पोलिसांत गुन्हा दाखल करण्यात आला आहे.

• वाशी: घर फोडून ४० हजारांचे सोयाबीन पळवले

  शेलगाव (ता. वाशी) येथील ७० वर्षीय ज्येष्ठ नागरिक सुदाम माणिक भैरट यांच्या बंद घराचे कुलूप तोडून चोरांनी घरात प्रवेश केला. त्यांनी घरात ठेवलेले ४० हजार रुपये किमतीचे सोयाबीनचे ८ कट्टे चोरून नेले. याप्रकरणी वाशी पोलिसांत गुन्हा दाखल आहे.

• आनंदनगर (धाराशिव): समर्थनगरातून दुचाकी चोरी

  कामेगाव येथील अमरसिंह मोहिते (वय २९) यांची २० हजार रुपये किमतीची सुझुकी ॲक्सेस दुचाकी (MH 25 AH 2343) ५ फेब्रुवारी रोजी सकाळी समर्थनगर (धाराशिव) येथून अज्ञाताने चोरून नेली. याप्रकरणी आनंदनगर पोलीस ठाण्यात गुन्हा नोंदवण्यात आला आहे.