धाराशिव : जिल्ह्यात चोरीच्या घटनांमध्ये मोठी वाढ झाली असून, कळंब, तुळजापूर आणि उमरगा तालुक्यांतून अज्ञात चोरट्यांनी दोन मोटारसायकली, ५० हजारांचे सोन्याचे दागिने आणि ७० हजार रुपये किमतीची एक म्हैस असा एकूण दोन लाखांहून अधिक किमतीचा ऐवज लांबवल्याचे समोर आले आहे. या सर्व घटनांप्रकरणी सोमवारी (दि. २३ फेब्रुवारी २०२६) संबंधित पोलीस ठाण्यांमध्ये भारतीय न्याय संहिता (BNS) कलम ३०३(२) अन्वये गुन्हे दाखल करण्यात आले आहेत.
१. कळंब: दुकानासमोरून दुचाकीची चोरी
रवींद्र जनार्धन वाकुरे (वय ४५, रा. कोथळा, ह.मु. एसटी कॉलनी डिकसळ, ता. कळंब) यांची ३५,००० रुपये किमतीची ‘एचएफ डिलक्स’ दुचाकी (क्र. MH 25 AP 6306) चोरीला गेली आहे. १९ फेब्रुवारी रोजी सायंकाळी ६.३० ते ७.०० च्या सुमारास ढोकी रोडवरील अंबिका मशीन टूल्स दुकानासमोरून अज्ञात व्यक्तीने ही दुचाकी चोरून नेली. याप्रकरणी कळंब पोलीस ठाण्यात गुन्हा नोंदवण्यात आला आहे.
२. तुळजापूर: शेतशिवारातून ७० हजारांची म्हैस पळवली
गोपाळ महादेव बागल (वय ४५, रा. सांगवी मार्डी, ता. तुळजापूर) यांच्या सांगवी मार्डी येथील शेतशिवारातून अज्ञात चोरट्यांनी तब्बल ७०,००० रुपये किमतीची एक म्हैस चोरून नेली आहे. याप्रकरणी त्यांनी दिलेल्या फिर्यादीवरून तुळजापूर पोलीस ठाण्यात अज्ञाताविरुद्ध गुन्हा दाखल करण्यात आला आहे.
३. उमरगा: गर्दीचा फायदा घेत एसटी बसमध्ये महिलेचे दागिने लांबवले
मनीषा नागेश मुळे (वय ३५, रा. सराटी, ता. तुळजापूर) या २३ फेब्रुवारी रोजी पंढरपूर ते हैदराबाद बसने अणदूर ते उमरगा असा प्रवास करत होत्या. यावेळी उमरगा बसस्थानकावर गर्दीचा फायदा घेऊन अज्ञात व्यक्तीने त्यांच्या पर्समधील २० ग्रॅम वजनाचे आणि अंदाजे ५०,००० रुपये किमतीचे सोन्याचे दागिने चोरून नेले. याप्रकरणी उमरगा पोलीस ठाण्यात गुन्हा दाखल करण्यात आला आहे.
४. उमरगा: रुग्णालयाच्या पार्किंगमधून ‘युनिकॉर्न’ दुचाकी लंपास
संदीप दादाराव वडदरे (वय ३१, रा. कराळी, ता. उमरगा) यांची ५०,००० रुपये किमतीची ‘होंडा युनिकॉर्न’ दुचाकी (क्र. MH 25 AZ 8074) चोरीला गेली आहे. १८ फेब्रुवारी रोजी सकाळी ओम मल्टी स्पेशालिटी हॉस्पिटल, उमरगा येथे ते गेले असता, पार्किंगमधून अज्ञात चोरट्याने ही गाडी लंपास केली. या प्रकरणीही उमरगा पोलिसांत गुन्हा नोंदवण्यात आला आहे.
