धाराशिव – जिल्ह्याचे मुख्यालय असलेल्या परिषदेमध्ये अनेक कामांचा अनियमित कारभार सुरू असून यामधील एका अनियमित कारभाराचे दप्तरच हाती लागले आहे. विशेष म्हणजे या वाहनांना रस्त्यावर चालविण्यासाठी आवश्यक असलेल्या परवान्यापैकी एकही परवाना २०२२ पासून आजपर्यंत काढलेला नाही किंवा त्याची पूर्तता देखील केलेली नाही. सर्वात महत्त्वाचे म्हणजे मुख्य कार्यकारी अधिकारी यांच्या परस्परच अनधिकपणे समक्ष मान्यता न घेता ती वाहने मनमानीपणे संबंधित पंचायत समितीला वर्ग करण्याचा महाप्रताप प्रभारी उप अभियंता असलेल्या …स्वयंघोषित…कारभाऱ्यांने बिनधास्तपणे केला आहे.
धाराशिव जिल्हा परिषद अंतर्गत असलेल्या पंचायत समिती कार्यालयातील यांत्रिकी उपविभागाच्या नियंत्रणाखाली असलेल्या हात पंप देखभाल दुरुस्ती पथकासाठी वाहने आहेत. पंचायत समितीची सर्वे वाहने ही मुख्य कार्यकारी अधिकारी यांच्या नावावर नोंदणीकृत आहेत. त्यामुळे ती वाहने इतर विभागाकडे देण्यासाठी मुख्य कार्यकारी अधिकारी यांच्या समक्ष मान्यता घेणे गरजेचे आहे. मात्र प्रभारी उप अभियंता एस.पी. शिंदे यांनी आपल्या सहीने वेगवेगळ्या तालुक्यांमध्ये अनाधिकृतपणे समक्ष मान्यता न घेता वापर केलेला आहे.
ही सर्व वाहने पंचायत समिती कार्यालयातील यांत्रिकी उपविभागाच्या नियंत्रणाखाली असलेल्या हातपंप देखभाल दुरुस्तीसाठी वापरली जातात. या वाहनांमध्ये जिल्ह्यातील पंचायत समिती यांचा समावेश आहे.
हात पंप दुरुस्तीसाठी असलेल्या महिंद्रा अँड महिंद्रा लिमिटेड कंपनीची बोलेरो कम्पर 2WDPS GOODS CARRIER (LGV) या माल वाहतूक वाहनांचे इन्शुरन्स (विमा), फिटनेस प्रमाणपत्र, पीयूसी, वाहनांच्या मंजुरीचे आदेश, वाहनांचे लॉक बुक आदी असणे अत्यंत गरजेचे आहे. जर यापैकी एकही प्रमाणपत्र नसेल तर ते वाहन रस्त्यावर उतरविले जाऊ शकत नाही. जर रस्त्यावर वाहन उतरविले तर संबंधितावर कारवाई केली जाते. मात्र जिल्हा परिषदेच्या ताब्यात व वापरात असलेल्या वाहनांची २०२२ पासून आजपर्यंत वरीलपैकी कुठल्याही कागदपत्रांची पूर्तता केलेली नाही. तसेच वाहन वाहतूक नियमांचे पालन केलेले दिसून येत नाही. त्यामुळे कर्तव्यात कसूर केल्याप्रकरणी कोणावर जबाबदारी निश्चित करून कारवाई केली जाणार याकडे सर्वांचे लक्ष लागले आहे.
जिल्ह्यातील पंचायत समित्यांमधील ही वाहने असून यामध्ये धाराशिव – एमएच २५ – ४०२८, तुळजापूर – एमएच २५ – ४०२९, वाशी – एमएच २५ – ४०३०, कळंब – एमएच २५ – ४०३१, भूम आणि उमरगा – एमएच २५ – ४०३२ व एमएच २५ – ४०३३ या वाहनांचा समावेश आहे.
