धाराशिव जिल्ह्यात गुन्हेगारांचा सुळसुळाट! तुळजापुरात महिलेला चाकूचा धाक दाखवून लुटले; भूममध्ये बाईकच्या डिग्गीतून ४ लाख लंपास

धाराशिव: जिल्ह्यात चोरी, दरोडे आणि जबरी चोरीच्या घटनांमध्ये प्रचंड वाढ झाली असून वेगवेगळ्या ६ घटनांनी जिल्हा हादरला आहे. तुळजापुरात एका महिलेला चाकूचा धाक दाखवून भररस्त्यात लुटण्यात आले, तर भूम येथे सरकारी रुग्णालयाबाहेरून एका शेतकऱ्याच्या बाईकच्या डिग्गीतून ४ लाख रुपयांची रोकड लंपास करण्यात आली. याशिवाय पवनचक्की आणि सोलर कंपन्यांमधील लाखो रुपयांच्या कॉपर वायरची चोरी, दुचाकी व मोबाईल चोऱ्यांचे सत्र उघडकीस आले आहे. या सर्व प्रकरणी पोलिसांनी गुन्हे दाखल केले आहेत.

१. तुळजापुरात खळबळ! गैबीसाहेब दर्ग्याजवळ महिलेला चाकू दाखवून लुटले

तुळजापूर पोलिसांनी दिलेल्या माहितीनुसार, राधा भरत क्षिरसागर (वय ४९, रा. खोताची वाडी, ता. तुळजापूर) या गेल्या २६ एप्रिल रोजी सायंकाळी सव्वासहा वाजेच्या सुमारास शेतातून काम संपवून एकट्याच घराकडे पायी चालल्या होत्या. खोताची वाडी येथील गैबीसाहेब दर्ग्याजवळ त्यांना मोटरसायकलवरून आलेल्या तीन जणांनी अडवले.

हल्लेखोरांनी राधा यांना चाकूचा धाक दाखवून गळा दाबण्याची भीती घातली आणि त्यांच्या गळ्यातील १५ ग्रॅम वजनाचे सोन्याचे गंठण व ५ ग्रॅमच्या सोन्याच्या बाळ्या बळजबरीने ओरबाडून घेतल्या. दागिने हिसकावून आरोपी तात्काळ पसार झाले.

• गुन्हा दाखल: फिर्यादी राधा क्षिरसागर यांच्या तक्रारीवरून तुळजापूर पोलिसांत आरोपी राहुल सुनील भोसले, सुनील हुलप्पा भोसले आणि विशाल भागवत शिंदे (सर्व रा. धनेगाव, ता. तुळजापूर) यांच्याविरुद्ध भारतीय न्याय संहिता (BNS) कलम ३०४ अन्वये जबरी चोरीचा गुन्हा दाखल करण्यात आला आहे.

२. भूममध्ये मोठा डल्ला! रुग्णालयाबाहेरून बाईकच्या डिग्गीतील ४ लाख गायब

दुसरी मोठी चोरी भूम शहरात घडली. अर्जुन सुंदरराव मारकड (वय ५०, रा. सोनगिरी, ता. भूम) हे शुक्रवारी (दि. २९ मे) दुपारी भूम येथील सरकारी रुग्णालयात आले होते. त्यांनी आपली मोटरसायकल (क्र. MH 33 E 2057) रुग्णालयाच्या आवारात पार्क केली होती. त्यांच्याकडे असलेली ४ लाख रुपयांची रोख रक्कम त्यांनी एका स्टॉलमध्ये (कापडात) गुंडाळून बाईकच्या डिग्गीत ठेवली होती.

अर्जुन हे रुग्णालयात गेले असता, पाळत ठेवून असलेल्या चोरट्याने डिग्गीचे लॉक तोडून आतील ४ लाख रुपयांची रोकड लंपास केली.

• गुन्हा दाखल: याप्रकरणी आरोपी ऋषीकेश वेदपाठक (रा. भूम) व त्याच्या दोन अनोळखी साथीदारांविरुद्ध भूम पोलीस ठाण्यात BNS कलम ३०३(२) आणि ३(५) अन्वये गुन्हा दाखल करण्यात आला आहे.

३. येरमाळ्यात घरासमोरून ‘होंडा शाईन’ चोरीला

येरमाळा शहरातील रहिवासी विजयकुमार हनमंत बारकुल (वय ४२, रा. येरमाळा, ता. कळंब) यांनी त्यांची ३५ हजार रुपये किमतीची होंडा शाईन मोटरसायकल (क्र. MH 25 AF 3148) २४ मे रोजी रात्री घरासमोर पार्क केली होती. मध्यरात्री अज्ञात चोरट्याने ही दुचाकी चोरून नेली. याप्रकरणी येरमाळा पोलिसांत अज्ञात चोराविरुद्ध गुन्हा दाखल झाला आहे.

४. नांदुर्गा येथे ‘रिन्युग्रीन एनर्जी’ कंपनीचा ट्रान्सफॉर्मर फोडला

बेंबळी पोलीस ठाण्याच्या हद्दीतील नांदुर्गा येथे असलेल्या ‘रिन्युग्रीन एनर्जी’ कंपनीच्या प्लांटवर १३ मे रोजी मध्यरात्री चोरट्यांनी डल्ला मारला. अज्ञात चोरांनी प्लांटवरील ट्रान्सफॉर्मर फोडून त्यातील तब्बल ७० हजार रुपये किमतीचे कॉपरचे बसबार (तांब्या पट्ट्या) चोरून नेले. तसेच तोडफोड करत कंपनीचे ४० हजार रुपयांचे नुकसान केले. सुरक्षा रक्षक विशाल अशोक तनमोर यांच्या फिर्यादीवरून बेंबळी पोलिसांत गुन्हा दाखल करण्यात आला आहे.

५. पवनचक्कीचे लोकेशन हुडकून दीड लाखांची कॉपर वायर लंपास

बेंबळी शिवारात कार्यरत असलेल्या ‘सोराजीन आर ई सर्व्हीसेस प्रा.ली.’ या पवनचक्की कंपनीच्या विविध ७ लोकेशनवर (एसओएल १२७, १२६, ५८, १३०, ६४, १४४, ९६) चोरांनी धुमाकूळ घातला. चोरांनी एकूण १ लाख ५० हजार रुपयांची कॉपर केबल/वायर कापून चोरून नेली, तसेच तोडफोड करत पवनचक्कीचे २ लाख रुपयांचे नुकसान केले. सिक्युरिटी एजन्सीचे सुपरवायझर युवराज अजित परतापुरे यांच्या फिर्यादीवरून बेंबळी पोलिसांत गुन्हा नोंदवला आहे.

६. बार्शी नाका येथील ‘शिवनेरी बॉईज हॉस्टेल’मधून २ मोबाईल चोरीला

धाराशिव शहरातील जिजाऊ चौक, बार्शी नाका परिसरातील ‘शिवनेरी बॉईज हॉस्टेल’मध्ये राहणाऱ्या विद्यार्थ्यांचे मोबाईल चोरीला गेले आहेत. २३ मे रोजी रात्री हॉस्टेलच्या रूममधील खिडकीच्या ओट्यावर ठेवलेले रितेश धनराज भोसले यांचा ७ हजार रुपयांचा आणि ज्ञानेश्वर डिकले यांचा १३ हजार रुपयांचा, असा एकूण २० हजार रुपयांचे दोन मोबाईल अज्ञात चोराने खिडकीतून हात साफ करत चोरून नेले. आनंदनगर पोलिसांनी याप्रकरणी अज्ञात चोराविरुद्ध गुन्हा दाखल केला आहे.