धाराशिव – जिल्ह्यातील ट्रिगर-२ लागू केलेल्या तीन तालुक्यांचाच विचार न करता संपूर्ण जिल्ह्याची ‘पीक व पाण्याची’ परिस्थिती पाहता दुष्काळ जाहीर करून मदत व सवलती तातडीने लागू करण्याची मागणी आ. राणाजगजितसिंह पाटील यांनी मुख्यमंत्र्यांकडे केली आहे.
धाराशिव जिल्ह्यात घटलेल्या पर्जन्यमानामुळे भूजल पातळी ही गेल्या ५ वर्षांच्या सरासरीच्या तुलनेत १.६ मीटरने घटलेली आहे. सहसा अशी परिस्थिती मे महिन्यामध्ये बघायला मिळते. तसेच तलावांमधील जलसाठा हा अंदाजे १२% आहे, जो की गतवर्षी ऑक्टोबर महिन्यात ८०% होता. प्राप्त परिस्थितीत रबी हंगामात येणाऱ्या दिवसांत पाऊस न पडल्यास अल्प अशी लागवड होणार आहे.खरीप हंगामात देखील जिल्ह्यातील सर्वच मंडळामध्ये कमी पर्जन्यमानामुळे २५% अग्रिम पीकविमा देण्याची मागणी आहे. व्यापक स्वरुपात खरीप पिकाच्या उत्पादनामध्ये मोठ्या प्रमाणात घट आलेली आहे.
रबी हंगामातील संभाव्य लागवडीची परिस्थिती पाहता, जिल्ह्यातील घटलेली भूजल पातळी व तलावांमधील उपलब्ध जलसाठा लक्षात घेता आठही तालुक्यांत दुष्काळ जाहीर करणे गरजेचे आहे.जिल्ह्यातील ३ तालुक्यात जरी ट्रिगर-२ लागू केला असला तरी उर्वरित ५ तालुक्यात देखील परिस्थिती गंभीर आहे आहे त्यामुळे जिल्हाधिकारी यांना याबाबत वस्तुनिष्ठ अहवाल शासनाकडे सादर करण्याबाबत सूचना दिल्या आहेत.
धाराशिव जिल्ह्यातील तीन तालुक्यांत ट्रिगर-२ लागू केला असला तरी संपूर्ण जिल्ह्याची ‘पीक व पाण्याची’ परिस्थिती ट्रिगर लागू केलल्या तालुक्याप्रमाणे असल्याने दुष्काळ जाहीर करताना संपूर्ण जिल्ह्याचाच विचार करून वस्तुनिष्ठ आढावा घेवून संपूर्ण जिल्ह्यात दुष्काळ जाहीर करून मदत व सवलती तातडीने लागू करण्याची मागणी आ. राणाजगजितसिंह पाटील यांनी मुख्यमंत्र्यांकडे केली आहे
