धाराशिव : जिल्ह्यात ग्रामीण भागात चोऱ्यांचे सत्र वाढले असून, उमरगा आणि वाशी तालुक्यात शेतकरी आणि शेती-साहित्य चोरांचे लक्ष्य बनले आहेत. गेल्या काही दिवसांत घडलेल्या वेगवेगळ्या घटनांमध्ये चोरट्यांनी सोयाबीन, खते, सौर पंप आणि विजेच्या तारा लंपास केल्याने शेतकऱ्यांमध्ये चिंतेचे वातावरण आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
उमरग्यात शेड फोडून सोयाबीन आणि रोकड पळवली
उमरगा तालुक्यातील मुळज येथील शेतकरी मदन विठ्ठलराव दुधभाते (वय ६५) यांच्या शेतातील पत्र्याच्या शेडचा दरवाजा उचकटून चोरट्यांनी आत प्रवेश केला. ११ जून रोजी मध्यरात्री दीडच्या सुमारास घडलेल्या या घटनेत चोरट्यांनी ८ बॅग सोयाबीन, १ पोते खत आणि २,५०० रुपये रोख रक्कम असा एकूण २३,००० रुपयांचा ऐवज चोरून नेला. याप्रकरणी मदन दुधभाते यांनी दिलेल्या फिर्यादीवरून उमरगा पोलीस ठाण्यात तीन अज्ञात व्यक्तींविरोधात गुन्हा नोंदवण्यात आला आहे.
वाशी तालुक्यात सौर पंप आणि तारांची चोरी
वाशी तालुक्यातही चोरांनी धुमाकूळ घातला आहे. पारगाव येथील शेतकरी शरद दत्तात्रय आखाडे (वय ३७) यांच्या शेतातील विहिरीवर बसवलेला सौर पंप आणि वायर असा एकूण १७,००० रुपयांचा ऐवज अज्ञात चोरट्यांनी चोरून नेला. इतकेच नाही, तर जाताना त्यांनी सौर ऊर्जेच्या दोन प्लेट्स फोडून नुकसानही केले. ही घटना १ आणि २ जून दरम्यान घडली.
दुसऱ्या एका घटनेत, तालुक्यातील नागेवाडी शिवारात शेतातील सहा पोलवरील तब्बल दीड लाख रुपये किमतीची ५०० मीटर विजेची तार अज्ञात व्यक्तीने चोरून नेल्याचे उघडकीस आले आहे. २८ मे रोजी घडलेल्या या घटनेप्रकरणी अमोल अश्रुबा मोटे (वय ४०) यांनी वाशी पोलीस ठाण्यात फिर्याद दिली आहे.
या सर्व प्रकरणांमध्ये पोलिसांनी भारतीय न्याय संहितेच्या संबंधित कलमांनुसार गुन्हे दाखल केले असून, आरोपींचा शोध सुरू केला आहे. मात्र, शेतीमालासोबतच महागडे साहित्यही चोरीला जात असल्याने ग्रामीण भागात भीतीचे वातावरण पसरले आहे.
