धाराशिवचे माजी अपर पोलीस अधीक्षक गौहर हसन यांच्या खासगी स्कॉर्पिओ गाडीला मंगळवारी रात्री साडेदहा वाजण्याच्या सुमारास तुळजापूर रोडवरील पळसवाडीजवळ भीषण अपघात झाला. एका भरधाव कंटेनरने त्यांच्या गाडीला जोरदार धडक दिली. या अपघातात स्कॉर्पिओ गाडीचे मोठ्या प्रमाणात नुकसान झाले आहे. सुदैवाने, गौहर हसन आणि त्यांचे चालक या अपघातातून थोडक्यात बचावले असून त्यांना कोणतीही गंभीर इजा झालेली नाही.
गौहर हसन हे धाराशिवच्या सध्याच्या अपर पोलीस अधीक्षक शफकत आमना यांचे पती आहेत. अपघाताची माहिती मिळताच पोलीस घटनास्थळी दाखल झाले आणि पुढील कारवाई सुरू केली. या घटनेमुळे काही काळ वाहतूक विस्कळीत झाली होती.
कंटेनरने मागून धडक दिल्याने हा अपघात झाल्याचे समजते. अपघातानंतर चालक पळून गेला आहे. गौहर हसन आणि त्यांचा चालक हे किरकोळ जखमी झाले असून, त्यांना उपचारासाठी शासकीय रुग्णालयात दाखल करण्यात आले आहे. गाडीमध्ये सध्याच्या अपर पोलीस अधीक्षक शफकत आमना या देखील होत्या. त्यांना कसलीही इजा झाली नाही, असे पोलीस सूत्रांकडून समजते.
