धाराशिव – धाराशिव जिल्ह्यात मोटारसायकल, उच्चदाब वीजवाहिनीची ॲल्युमिनियम तार आणि ट्रकमधील डिझेल चोरीच्या चार वेगवेगळ्या घटना उघडकीस आल्या आहेत. या प्रकरणी संबंधित पोलीस ठाण्यांमध्ये अज्ञात चोरट्यांविरुद्ध भारतीय न्याय संहितेच्या (BNS) विविध कलमांनुसार गुन्हे दाखल करण्यात आले आहेत.
धाराशिव शहरातील बेंबळी रोडवरील शिवपार्वतीनगर येथून रमाकांत गोपाळराव कुर्ले (वय 63) यांची सुमारे 80 हजार रुपये किमतीची होंडा शाईन (एमएच-25-बीसी-6794) मोटारसायकल 20 ते 21 जुलैदरम्यान अज्ञात चोरट्याने लंपास केली. याप्रकरणी धाराशिव शहर पोलीस ठाण्यात भा.न्या.सं. कलम 303(2) अन्वये गुन्हा दाखल करण्यात आला आहे.
दरम्यान, बेंबळी पोलीस ठाण्याच्या हद्दीत सिरेन्टीका कंपनीच्या 33 केव्ही उपवाहिनीवरील ॲल्युमिनियम तार चोरीच्या दोन घटना समोर आल्या आहेत. बरमगाव शिवारात 29 जून रोजी सहा पोलवरील सुमारे एक किलोमीटर लांबीची वीजतार, अंदाजे 70 हजार रुपयांचा मुद्देमाल, अज्ञात चोरट्यांनी चोरून नेल्याची फिर्याद सुपरवायझर खंडेराव दगडू भतलवंडे यांनी दिली आहे.
तसेच, आंबेवाडी शिवारात 5 जुलै रोजी याच प्रकारे सहा पोलवरील सुमारे एक किलोमीटर ॲल्युमिनियम तार, अंदाजे 70 हजार रुपये किमतीचा मुद्देमाल चोरीला गेला. या प्रकरणी सोरिजन आर. ई. सर्व्हिसेस प्रा. लि.चे असिस्टंट जनरल मॅनेजर संतोष कृष्णराव पेरुले यांनी फिर्याद दिली आहे. दोन्ही प्रकरणांमध्ये भा.न्या.सं. कलम 303(2) व 324(4) अन्वये गुन्हे दाखल करण्यात आले आहेत.
याशिवाय, तामलवाडी पोलीस ठाण्याच्या हद्दीत बालाजी आमाईन्ससमोर उभ्या असलेल्या ट्रकमधून 210 लिटर डिझेल, अंदाजे 20 हजार 580 रुपये किमतीचे, अज्ञात चोरट्यांनी स्विफ्ट कारच्या सहाय्याने चोरी केल्याची घटना घडली. ट्रक चालक प्रथमेश दत्तात्रय कोळेकर (रा. नारायण चिंचोळी, जि. सोलापूर) यांनी दिलेल्या फिर्यादीवरून तामलवाडी पोलीस ठाण्यात भा.न्या.सं. कलम 303(2) अन्वये गुन्हा दाखल करण्यात आला असून पोलीस पुढील तपास करीत आहेत.
