धाराशिव – एकीकडे ‘गणपती बाप्पा मोरया, पुढच्या वर्षी लवकर या’चा भावनिक गजर… आणि दुसरीकडे होऊ घातलेल्या स्थानिक स्वराज्य संस्थांच्या निवडणुकीचा डिजिटल धुरळा! धाराशिव शहराने शनिवारी पार पडलेली गणेश विसर्जन मिरवणूक या दोन्ही दृश्यांची साक्षीदार ठरली. बाप्पाला निरोप देताना धाराशिवकरांचे डोळे पाणावले होते, पण राजकीय कार्यकर्त्यांच्या ‘रिल्स’च्या खेळामुळे अनेकांच्या भुवया उंचावल्या होत्या.
झाले असे की, नगर पालिका, जिल्हा परिषद आणि पंचायत समितीच्या निवडणुका तोंडावर आल्याने यंदाच्या गणेशोत्सवात राजकीय कार्यकर्त्यांचा उत्साह ओसंडून वाहत होता. शहरातील मंडळांना आकर्षित करण्यासाठी ‘शिस्तबद्ध मिरवणुकी’साठी मोठमोठी बक्षिसे जाहीर करण्यात आली होती. पण गंमत म्हणजे, ज्यांनी शिस्तीचे धडे दिले, त्यांच्याच कार्यकर्त्यांनी बेशिस्तीचा कळस गाठला.
शहराच्या प्रमुख चौकात, एकमेकांना आव्हान देण्यासाठी राजकीय गटांनी समोरासमोर स्टेज उभारले. अपेक्षेप्रमाणे येथे विचारांचे आदान-प्रदान झाले नाही, तर झाले ते फक्त ‘रिल्स’चे युद्ध! एका बाजूला ‘गब्बरसिंह’ आणि त्यांच्या ‘ब्लडर बँक’ नावाच्या अतरंगी गटाच्या कार्यकर्त्यांनी ‘नादी नको लागू, ढोलकीला बांधून बदा बदा बडवीन’ या गाण्यावर ठेका धरत एक व्हिडिओ बनवला. हा व्हिडिओ म्हणजे जणू काही राजकीय विरोधकांना दिलेली थेट धमकीच होती.
हे पाहून ‘सूर्यराजे’ आणि त्यांचे सहकारी शांतपणे स्मित हास्य करत सर्व प्रकार पाहात होते. पाहता पाहता, बाप्पाच्या मिरवणुकीपेक्षा गब्बरसिंह’ आणि त्यांच्या ‘ब्लडर बँक’ केलेले चाळ्याचे दोन ‘रिल्स’चीच चर्चा अधिक होऊ लागली.
या संपूर्ण प्रकारात, बाप्पा तर पुढच्या वर्षी परत येतील, पण निवडणुकीचा हा ‘रिल्सोत्सव’ आतापासूनच सुरू झाल्याने, मतदारांना मात्र प्रश्न पडला आहे की, मत विकासाच्या मुद्द्यावर द्यायचे की ज्याचे रिल्स जास्त व्हायरल होतील त्याला द्यायचे?
