धाराशिव – तालुक्यातील दाऊतपूर येथे प्राथमिक आरोग्य उपकेंद्राच्या बांधकामादरम्यान विनापरवाना गौण खनिज उत्खनन करून वापरल्याप्रकरणी मे. एस. जे. कन्स्ट्रक्शन यांना 38.84 लाख रुपयांचा दंड ठोठावण्यात आला आहे. दंडाची रक्कम अद्याप भरली नसल्याने कंत्राटदाराच्या मालमत्तेवर बोजा चढवण्याची प्रक्रिया सुरू करण्यात आली आहे.
तक्रार आणि सुनावणी
सत्यशोधक तथा माहिती अधिकार कार्यकर्ते बाळासाहेब सुभेदार यांनी 29 सप्टेंबर 2022 रोजी जिल्हाधिकारी, धाराशिव यांच्याकडे यासंदर्भात तक्रार केली होती. तत्कालीन उपविभागीय अधिकारी, धाराशिव योगेश खरमाटे यांच्याकडे या तक्रारीची सुनावणी झाली. सुनावणीदरम्यान, कंत्राटदाराने विनापरवाना गौण खनिज उत्खनन केल्याचे सिद्ध झाले.
वसुलीची कार्यवाही
दंडाची रक्कम कंत्राटदाराने भरली नसल्याने तहसीलदार डॉ. मृणाल जाधव यांनी वसुलीची कार्यवाही सुरू केली आहे. जिल्हा परिषद बांधकाम विभागाचे कार्यकारी अभियंता यांना बिलातून दंडाची रक्कम वसूल करण्याचे निर्देश देण्यात आले आहेत. तसेच, कंत्राटदाराच्या कुटुंबाच्या नावावर असलेल्या मालमत्तेचा तपशील सादर करण्याचे आदेशही देण्यात आले आहेत.
- रुईभर येथील मे. एस. जे. कन्स्ट्रक्शनच्या प्रोप्रा.- शैलजा जयप्रकाश कोळगे या आहेत.
