धाराशिव / कळंब: जिल्ह्यात अवैध गोवंश कत्तल आणि जनावरांची बेकायदेशीर वाहतूक करणाऱ्यांविरोधात पोलिसांनी धडक मोहीम हाती घेतली आहे. धाराशिव शहर आणि शिराढोण पोलीस ठाण्याच्या पथकांनी दोन वेगवेगळ्या ठिकाणी केलेल्या कारवायांमध्ये तब्बल ६ गायी-वासरे आणि ५ बैलांची कत्तलखान्यातून सुटका करण्यात आली आहे. या दोन्ही कारवायांमध्ये वाहनासह कत्तलीचे साहित्य असा एकूण ११ लाख ४७ हजार रुपयांहून अधिकचा मुद्देमाल जप्त करण्यात आला असून, ९ जणांविरुद्ध गुन्हे दाखल करण्यात आले आहेत.
१. पहिली कारवाई: नागनाथ रोडवर पिकअप जप्त; ४ जर्शी गायी व २ वासरांची सुटका
धाराशिव शहर पोलिसांनी दिलेल्या माहितीनुसार, शहरातून एका पिकअप गाडीमधून गोवंशीय जनावरांची बेकायदेशीर आणि निर्दयतेने वाहतूक केली जात असल्याची माहिती पोलिसांना मिळाली होती. त्यानुसार पोलिसांनी गुरुवार, दि. २८ मे रोजी रात्री पावणेदहा वाजेच्या सुमारास नागनाथ रोडवर सापळा रचला.
पोलिसांनी संशयास्पद रितीने येणारी बोलेरो पिकअप (क्र. MH 24 AU 5292) थांबवून तिची झडती घेतली. यावेळी वाहनामध्ये ४ जर्शी गायी आणि २ वासरे अत्यंत दाटीवाटीने, चारा-पाण्याची कोणतीही व्यवस्था न करता कत्तलखान्याकडे नेली जात असताना मिळून आली. पोलिसांनी ८६ हजार रुपये किमतीच्या सर्व ६ जनावरांची सुटका केली असून २ लाख रुपयांची पिकअप जप्त केली आहे.
चालकावर गुन्हा दाखल: याप्रकरणी पोलिसांनी संशयित चालक साहिल पिरसाब शेख (वय २६, रा. एमके हॉलच्या पाठीमागे, धाराशिव) याला ताब्यात घेतले असून, त्याच्याविरुद्ध धाराशिव शहर पोलीस ठाण्यात ‘प्राण्यांना क्रूरतेने वागवण्यास प्रतिबंध अधिनियम’ व ‘महाराष्ट्र प्राणी संरक्षण अधिनियमा’ंतर्गत गुन्हा दाखल केला आहे.
२. दुसरी कारवाई: शिराढोण शिवारात कत्तलखाना उद्ध्वस्त! शेतातील गोठ्यातून ५ बैल जप्त, ८ जणांवर गुन्हा
दुसरी मोठी कारवाई कळंब तालुक्यातील शिराढोण पोलीस ठाण्याच्या पथकाने केली. शिराढोण शिवारातील शेत गट नंबर २४९ मध्ये मोठ्या प्रमाणावर गोवंशीय जनावरांची कत्तल केली जात असल्याची खात्रीशीर माहिती पोलिसांना मिळाली होती. या माहितीच्या आधारे पोलिसांच्या पथकाने शुक्रवार, दि. २९ मे रोजी सकाळी पावणेअकरा वाजेच्या सुमारास संशयित मंजूर कुरेशी याच्या शेतात छापा टाकला.
पोलिसांनी शेतातील गोठ्याच्या बाजूला असलेल्या पत्राच्या शेडमध्ये पाहिले असता, तिथे ५ गोवंशीय बैल कत्तलीच्या उद्देशाने चारा-पाण्याविना निर्दयतेने बांधून ठेवल्याचे आढळून आले. तसेच तिथे कत्तल करण्यासाठी लागणारे मोठे साहित्यही पोलिसांना मिळून आले. पोलिसांनी जनावरे आणि कत्तलीचे साहित्य असा एकूण ८ लाख ६१ हजार १५० रुपयांचा मुद्देमाल जागीच जप्त केला.
या ८ आरोपींवर गुन्हा दाखल:
याप्रकरणी शेतमालक मंजूर उस्मान कुरेशी (वय ४०), अयुब ईसाक कुरेशी (वय ६८), खयुम अयुब कुरेशी (वय ४०), सिकंदर गुलाममोद्दीन कुरेशी (वय ५२), सिद्दीक हमीद कुरेशी (वय ३५), मुक्तार उस्मान कुरेशी (वय ४८), युनुस पाशा कुरेशी (वय ३२) आणि मुस्तफा उर्फ बबलु नसीर शेख (वय २०, सर्व रा. शिराढोण, ता. कळंब) या आठ जणांविरुद्ध शिराढोण पोलीस ठाण्यात ‘महाराष्ट्र प्राणी संरक्षण कायदा’ आणि ‘प्राणी छळ प्रतिबंधक कायद्या’नुसार गुन्हा दाखल करण्यात आला आहे.
पोलिसांनी एकाच वेळी शहरात आणि ग्रामीण भागात केलेल्या या धडक कारवायांमुळे अवैध कत्तलखाने चालवणारे आणि जनावरांची तस्करी करणाऱ्या टोळ्यांचे धाबे दणाणले आहेत. दोन्ही पोलीस ठाण्यांचे पथक या प्रकरणांचा पुढील तपास करत आहेत.
