धाराशिव: येरमाळा येथील येडेश्वरी यात्रेमध्ये महिला भाविकांच्या गळ्यातील मंगळसूत्र आणि सोन्याचे दागिने चोरणाऱ्या एका टोळीला स्थानिक गुन्हे शाखेच्या (एलसीबी) पथकाने जेरबंद केले आहे. या कारवाईत दोन महिलांसह एका पुरुषाला अटक करण्यात आली असून, त्यांच्याकडून १ लाख ३१ हजार रुपये किमतीचे सोन्याचे दागिने जप्त करण्यात आले आहेत.
पोलिसांनी दिलेल्या माहितीनुसार, दि. ३ एप्रिल रोजी येडेश्वरी यात्रेमध्ये गर्दीच्या ठिकाणी गुन्हे घडू नयेत याकरिता स्थानिक गुन्हे शाखेचे पथक पायी गस्त घालत होते. यावेळी गुप्त बातमीदारामार्फत पोलिसांना माहिती मिळाली की, आमराई परिसरातील मंदिराजवळ दोन महिला आणि एक इसम चोरी करण्याच्या उद्देशाने संशयास्पदरीत्या फिरत आहेत. पथकाने तात्काळ त्या ठिकाणी जाऊन या तिघांवर पाळत ठेवली आणि ते गर्दीत चोरी करण्याचा प्रयत्न करत असताना त्यांना ताब्यात घेतले.
सुरुवातीला त्यांनी उडवाउडवीची उत्तरे दिली, मात्र संशय बळावल्याने त्यांना येरमाळा पोलीस ठाण्यात आणून सखोल चौकशी करण्यात आली. पोलिसांनी त्यांची नावे विचारली असता त्यांनी खालीलप्रमाणे माहिती दिली:
-
अनिल शेषेराव शिंदे (वय ३४ वर्षे) सुनीता अनिल शिंदे (वय २९ वर्षे) हिराबाई रमेश शिंदे (वय ४० वर्षे) हे सर्व आरोपी इंदिरानगर, पाथरी (ता. पाथरी, जि. परभणी) येथील रहिवासी आहेत.
-
पंचांसमक्ष आरोपींची अंगझडती घेण्यात आली. यावेळी आरोपी अनिल शिंदे याच्या पँटच्या खिशात ४ वेगवेगळे सोन्याचे मणी आणि मंगळसूत्र मिळून आले.
चोरीची पद्धत:
-
येरमाळा-बीड हायवेवर ब्रिज संपल्यावर उजव्या बाजूला रोडलगत यात्रेतील भाविकांना आंघोळीची व्यवस्था केली होती.
-
सकाळी ७.०० ते ९.०० च्या दरम्यान महिला भाविक तेथे आंघोळ करत असताना सोबतच्या दोन आरोपी महिला गर्दीचा फायदा घेऊन त्यांच्या गळ्यातील दागिने चोरायच्या.
-
चोरलेले हे दागिने त्या महिला आरोपी अनिल शिंदे याच्याकडे आणून द्यायच्या.
-
पोलिसांनी या आरोपींच्या अंगझडतीतून एकूण १,३१,००० रुपये किमतीचे ४ सोन्याचे मणी-मंगळसूत्र जप्त केले आहेत.
सदरची धडक कारवाई धाराशिवच्या पोलीस अधीक्षक श्रीमती रितू खोखर व अपर पोलीस अधीक्षक श्रीमती शफकत आमना यांच्या मार्गदर्शनाखाली करण्यात आली. या कारवाईतील पथकामध्ये स्थानिक गुन्हे शाखेचे पोलीस निरीक्षक. विनोद इज्जपवार, सपोनि सचिन खटके, तसेच पोलीस अंमलदार विनोद जानराव, नितीन जाधवर, बबन जाधवर, महिला पोह शोभा बांगर, महेबुब अरब आणि रोहीत दंडनाईक यांचा सहभाग होता.
