धाराशिव: सोलापूर-धुळे राष्ट्रीय महामार्गावरून जाणाऱ्या वाहनांना अडवून लुटणाऱ्या आणि चोरी करणाऱ्या दोन सराईत गुन्हेगारांना जेरबंद करण्यात स्थानिक गुन्हे शाखेला (LCB) मोठे यश आले आहे. या कारवाईत पोलिसांनी आरोपींकडून सुमारे ८ लाख २८ हजार रुपयांचा मुद्देमाल हस्तगत केला आहे.
याबाबत सविस्तर वृत्त असे की, दिनांक २४ डिसेंबर २०२५ रोजी ट्रक चालक रामजी शोभनाथ यादव हे सोलापूर-धुळे हायवेवरून आपल्या कंटेनरमधून नवीन टायर्स घेऊन जात होते. दरम्यान, तेरखेडा जवळील लक्ष्मी पारधी पिढी परिसरात त्यांच्या कंटेनरमधील नवीन टायर्सची चोरी झाली होती. या गंभीर गुन्ह्याची दखल घेत पोलीस अधीक्षक श्रीमती रितु खोखर यांनी तपासाचे आदेश दिले होते.
स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली पथक पेट्रोलिंग करत असताना, त्यांना गुप्त माहिती मिळाली की, या गुन्ह्यातील मुख्य आरोपी अनिल मच्छींद्र पवार (रा. लक्ष्मी पारधी पिढी, तेरखेडा) हा तेरखेडा गावात चोरीच्या दुचाकीसह आला आहे. पोलिसांनी तत्काळ सापळा रचला. पोलिसांना पाहताच आरोपीने पळून जाण्याचा प्रयत्न केला, मात्र पथकाने शिताफीने त्याला आणि त्याचा साथीदार नाना तानाजी शिंदे (रा. भिकारसारोळा, जि. धाराशिव) याला ताब्यात घेतले.
अनेक गुन्ह्यांची कबुली आणि मुद्देमाल जप्त
पोलिसांनी दोन्ही आरोपींची कसून चौकशी केली असता, त्यांनी सुरुवातीला उडवाउडवीची उत्तरे दिली. मात्र, पोलिसी खाक्या दाखवताच त्यांनी गुन्ह्याची कबुली दिली. त्यांनी आपल्या इतर दोन साथीदारांच्या मदतीने कंटेनरमधील टायर्स चोरल्याचे मान्य केले. तसेच पानगाव येथे चोरी केल्याचे आणि वाशी, बेंबळी, येरमाळा व भादा पोलीस ठाण्याच्या हद्दीतून मोटारसायकली चोरल्याचेही उघडकीस आले.
पोलिसांनी आरोपींनी लपवून ठेवलेला मुद्देमाल जप्त केला आहे. यामध्ये खालील वस्तूंचा समावेश आहे:
-
२९ नवीन टायर्स
-
०४ चोरीच्या मोटारसायकली
-
गुन्ह्यात वापरलेली एक चारचाकी गाडी
-
रोख रक्कम
असा एकूण ८,२८,६५९ रुपयांचा मुद्देमाल पोलिसांनी जप्त केला आहे.
ही धडाकेबाज कारवाई पोलीस अधीक्षक श्रीमती रितु खोखर, अपर पोलीस अधीक्षक श्रीमती शफकत आमना यांच्या मार्गदर्शनाखाली, स्थानिक गुन्हे शाखेचे पो.नि. विनोद इज्जपवार यांच्या आदेशाने सपोनि सचिन खटके, हवालदार विनोद जानराव, नितीन जाधवर, बबन जाधवर, महबूब अरब आणि रोहित दंडनाईक यांच्या पथकाने केली.
