धाराशिव : जिल्ह्यात सध्या भुरट्या चोरांचा सुळसुळाट वाढला असून, शेतकरी आणि वाहनचालकांची चिंता वाढली आहे. कळंब तालुक्यात उभ्या ट्रकमधून कांद्याचे कट्टे, तर तुळजापूर तालुक्यातील काळेगाव शिवारात शेतीपंपाची तब्बल ६७ हजार रुपयांची तांब्याची वायर (केबल) अज्ञात चोरट्यांनी लंपास केल्याच्या दोन स्वतंत्र घटना नुकत्याच उघडकीस आल्या आहेत. याप्रकरणी कळंब आणि नळदुर्ग पोलीस ठाण्यात अज्ञात चोरट्यांवर गुन्हे दाखल करण्यात आले आहेत.
मोहेकर महाविद्यालयासमोरून कांद्याची चोरी
कळंब तालुक्यातील डिकसळ येथील पाण्याच्या टाकीजवळ राहणारे रोहित अशोक कासीदकर (वय ३५) यांनी आपला ट्रक (क्र. एमएच ०९ ईएल ७७५६) डिकसळ येथील मोहेकर महाविद्यालयासमोर उभा केला होता. बुधवारी (ता. ११) रात्री साडेआठ ते गुरुवारी (ता. १२) सकाळी सहा वाजेच्या दरम्यान, अज्ञात चोरट्यांनी संधी साधून या ट्रकमधील ९ हजार रुपये किमतीचे १८ कांद्याचे कट्टे (पोते) चोरून नेले. या प्रकरणी रोहित कासीदकर यांनी गुरुवारी दिलेल्या फिर्यादीवरून कळंब पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०३(२) अन्वये गुन्हा नोंदवण्यात आला आहे.
साठवण तलावावरील मोटारीची केबल लंपास
चोरीची दुसरी घटना तुळजापूर तालुक्यातील काळेगाव शिवारात घडली. येथील रहिवासी नागनाथ सिद्धेश्वर बचापे (वय ४५) यांच्या शेतातील साठवण तलावावर ई-के मोटारी बसवल्या आहेत. मंगळवारी (ता. १०) रात्री साडेनऊ ते बुधवारी (ता. ११) सकाळी सहा वाजेच्या दरम्यान अज्ञात व्यक्तीने या मोटारींची तब्बल ३२०० फूट लांबीची ४ एमएम कॉपरची (तांब्याची) वायर कापून नेली. वेगवेगळ्या कंपनीच्या या चोरी गेलेल्या वायरची अंदाजे किंमत ६७ हजार २०० रुपये इतकी आहे. या प्रकरणी नागनाथ बचापे यांच्या फिर्यादीवरून गुरुवारी (ता. १२) नळदुर्ग पोलीस ठाण्यात अज्ञात चोरट्याविरुद्ध बीएनएस कलम ३०३(२) नुसार चोरीचा गुन्हा दाखल करण्यात आला आहे.
