येरमाळा : ‘माझ्याकडे पैसे नाहीत’ असे सांगितल्याच्या रागातून एका ५० वर्षीय व्यक्तीला शिवीगाळ करत लाथाबुक्क्यांनी आणि लोखंडी कोयत्याने बेदम मारहाण करून गंभीर जखमी केल्याची धक्कादायक घटना तेरखेडा (ता. वाशी) शिवारात घडली आहे. या प्रकरणी येरमाळा पोलीस ठाण्यात गुरुवारी (ता. १२) दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, महादेव ज्ञानोबा मोराळे (वय ५०, रा. वडजी, ता. वाशी, जि. धाराशिव) असे या हल्ल्यात गंभीर जखमी झालेल्या फिर्यादीचे नाव आहे. महादेव मोराळे हे शनिवारी (ता. ०७) संध्याकाळी साडेसात वाजण्याच्या सुमारास तेरखेडा शिवारातील शेत गट क्रमांक १०७५ मधील शेतात होते. त्यावेळी तिथे आरोपी सोमनाथ महादेव कांबळे (रा. नांदगाव, ता. वाशी) आणि त्याचा आणखी एक अनोळखी साथीदार आले.
आरोपींनी मोराळे यांच्याकडे पैशांची मागणी केली. यावर मोराळे यांनी ‘माझ्याकडे पैसे नाहीत’ असे सांगितले. याचाच राग आल्याने आरोपींनी मोराळे यांना अश्लील शिवीगाळ करण्यास सुरुवात केली. त्यानंतर दोघांनी मिळून मोराळे यांना लाथाबुक्क्यांनी मारहाण केली आणि सोबत आणलेल्या लोखंडी कोयत्याने सपासप वार करून त्यांना गंभीर जखमी केले.
या घटनेनंतर फिर्यादी महादेव मोराळे यांनी गुरुवारी (ता. १२) येरमाळा पोलीस ठाण्यात जाऊन रीतसर तक्रार दाखल केली. या प्रथम खबरेवरून येरमाळा पोलिसांनी आरोपी सोमनाथ कांबळे आणि इतर एका इसमाविरुद्ध भारतीय न्याय संहिता (BNS) कलम ११८(२), ३२९(३), ३५२ आणि ३(५) अन्वये गुन्हा नोंदवला आहे. या प्रकरणाचा पुढील तपास पोलीस करत आहेत.
