‘धाराशिव लाईव्ह’च्या बातमीचा दणका! १० कोटींच्या ‘हशीश ऑईल’ प्रकरणातील दोन्ही फरार आरोपी गजाआड

नळदुर्ग – नळदुर्ग-तुळजापूर रोडवर १० कोटी ३८ लाख रुपयांचे ‘हशीश ऑईल’ सोडून पसार झालेल्या आरोपींच्या मुसक्या आवळण्यात अखेर नळदुर्ग पोलिसांना यश आले आहे. ‘धाराशिव लाईव्ह’ने या कारवाईतील त्रुटी आणि पसार झालेल्या आरोपींवरून उपस्थित केलेल्या प्रश्नांनंतर तपासाची सूत्रे वेगाने हलली. तुळजापूरच्या ड्रग्ज प्रकरणानंतर उघडकीस आलेल्या या १० कोटींच्या अमली पदार्थ रॅकेटचे थेट ‘मालेगाव कनेक्शन’ आता समोर आले आहे.

ताज्या कारवाईतील ठळक घडामोडी:

• मुख्य आरोपींना बेड्या: या प्रकरणी नाशिक जिल्ह्यातील मालेगाव येथून वाशीम शहा आणि मोसीन खान या दोन मुख्य आरोपींना नळदुर्ग पोलिसांनी अखेर अटक केली आहे.

• मालेगाव कनेक्शन उघड: हे १० कोटींचे हशीश ऑईल मालेगावहून आणले जात असल्याचे प्राथमिक तपासात निष्पन्न झाले आहे.

• तुळजापूर रॅकेटचा तपास सुरू: हे अमली पदार्थ तुळजापूर परिसरात कुणाला पुरवले जाणार होते? यामागील ‘तुळजापूर कनेक्शन’ आणि स्थानिक सूत्रधार शोधण्याचे मोठे आव्हान आता पोलिसांसमोर असून त्याचा कसून तपास सुरू आहे.

दोन दिवसांचा थरार आणि फॉरेन्सिक तपास:

• परिसरात होती दहशत: १९ मार्च २०२६ रोजी पोलिसांच्या नाकेबंदी आणि कोम्बिंग ऑपरेशनदरम्यान, आरोपींनी कारमधून पळ काढताना जी संशयास्पद बॅग रस्त्यावर फेकली होती, त्या बॅगमुळे नळदुर्ग आणि तुळजापूर परिसरात सलग दोन दिवस प्रचंड घबराटीचे वातावरण निर्माण झाले होते.

• घटनास्थळी पोलिसांचा मुक्काम: परिस्थितीचे गांभीर्य ओळखून पोलिसांनी सलग दोन दिवस घटनास्थळीच तळ ठोकून कसून तपास केला.

• फॉरेन्सिक टीमची मदत: जप्त केलेल्या बॅगमधील काळ्या-हिरवट पदार्थाची फॉरेन्सिक (न्यायवैद्यक) टीमच्या मदतीने तातडीने तपासणी करण्यात आली. त्यानंतर तो पदार्थ गांजा किंवा इतर ड्रग्जसारखाच अत्यंत घातक आणि नशिल्या प्रतीचा ‘हशीश ऑईल (Hashish Oil)’ असल्याचे निष्पन्न झाले.

‘धाराशिव लाईव्ह’च्या आक्रमक पाठपुराव्यामुळे पोलिसांच्या तपासाला गती मिळाली आणि आरोपी गजाआड झाले आहेत. परंतु, या रॅकेटचे खरे कर्तेकरविते कोण आहेत, हे पाहणे आता महत्त्वाचे ठरणार आहे.

‘हशीश ऑईल’ (Hash Oil) म्हणजे नेमकं काय?

“हशीश ऑईल हा गांजाच्या (Cannabis) झाडापासून रासायनिक प्रक्रियेने काढलेला एक अतिशय घट्ट, चिकट आणि तीव्र अर्क (Extract) असतो. यामध्ये ‘THC’ (नशा आणणारा मुख्य घटक) चे प्रमाण साध्या गांजापेक्षा किंवा चरसपेक्षा कैक पटींनी जास्त असते. दिसायला हा काळपट-हिरवट रंगाचा द्रव असून, तो अत्यंत वेगाने आणि भयानक नशा देतो. हा आरोग्यासाठी प्रचंड घातक आणि जीवघेणा ठरू शकणारा अमली पदार्थ असून, भारतात यावर NDPS कायद्यांतर्गत कडक बंदी आहे.”