उमरगा : शेत जमिनीच्या वादातून साठ वर्षीय व्यक्तीला शिवीगाळ करून दगड, काठी व लाथाबुक्यांनी जबर मारहाण केल्याची घटना तालुक्यातील गुंजोटीवाडी येथे घडली आहे. याप्रकरणी पाच जणांविरुद्ध उमरगा पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रभाकर मुकुंदराव मशाळे (वय ६० वर्षे, रा. गुंजोटीवाडी) यांचे आरोपींसोबत गुंजोटीवाडी शिवारातील गट क्रमांक १७/३ मधील शेतजमिनीवरून वाद सुरू होता. दि. १८ जून २०२५ रोजी सकाळी ९ वाजण्याच्या सुमारास याच वादातून आरोपी महादेव दिनकर मशाळे, दिनकर मुकुंदराव मशाळे, राहुबाई दिनकर मशाळे, छायाबाई संदिप पाटील आणि दैवशाला दिनकर मशाळे (सर्व रा. गुंजोटीवाडी) यांनी गैरकायद्याची मंडळी जमवली.
आरोपींनी फिर्यादी प्रभाकर मशाळे यांना शिवीगाळ करत लाथाबुक्यांनी, तसेच दगड व काठीने मारहाण करून जखमी केले. याशिवाय, त्यांना जीवे मारण्याची धमकीही देण्यात आली.
या घटनेनंतर, प्रभाकर मशाळे यांनी दि. १९ जून २०२५ रोजी उमरगा पोलीस ठाण्यात फिर्याद दिली. त्यांच्या तक्रारीवरून पोलिसांनी पाचही आरोपींविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५२, ३५१(२)(३), १८९(२), १९१(२)(३), आणि १९० अन्वये गुन्हा नोंदवला आहे. पुढील तपास पोलीस करत आहेत.
