धाराशिव : रुग्णाला तपासले नाही, या किरकोळ कारणावरून संतप्त झालेल्या सुमारे १४ जणांच्या जमावाने शहरातील रामनगर भागातील पार्वती हॉस्पिटलमध्ये घुसून डॉक्टर दाम्पत्य आणि कर्मचाऱ्यांना बेदम मारहाण केल्याची धक्कादायक घटना घडली आहे. मंगळवारी रात्री घडलेल्या या घटनेत जमावाने दगड, काठ्या आणि वॉकरने हल्ला करत रुग्णालयाची मोठ्या प्रमाणात तोडफोड केली, ज्यात सुमारे तीन लाख रुपयांचे नुकसान झाले आहे.
याप्रकरणी डॉ. कुलदीप मोहनराव सस्ते (वय ४२) यांनी दिलेल्या फिर्यादीवरून आनंदनगर पोलीस ठाण्यात जमावाविरोधात गंभीर गुन्हे दाखल करण्यात आले आहेत.
पोलिसांनी दिलेल्या माहितीनुसार, मंगळवारी रात्री दहाच्या सुमारास डॉ. कुलदीप सस्ते यांच्या पार्वती हॉस्पिटलमध्ये दोन पुरुष, दोन महिला आणि त्यांच्यासोबत आलेले इतर दहा जण असे सुमारे १४ जण आले. त्यांनी, “पेशंटला तपासत का नाही?” असा जाब विचारत डॉ. सस्ते यांच्या पत्नीसोबत वाद घालण्यास सुरुवात केली. वादाचे रूपांतर थेट हाणामारीत झाले. जमावाने डॉक्टर पत्नीला शिवीगाळ करत लाथाबुक्क्यांनी, दगड, काठी आणि रुग्णालयातील वॉकरने मारहाण करून जखमी केले.
हा प्रकार पाहून रुग्णालयातील इतर कर्मचारी भांडण सोडवण्यासाठी पुढे आले असता, संतप्त जमावाने त्यांनाही मारहाण केली. एवढ्यावरच न थांबता, जमावाने रुग्णालयातील सामानाची आणि बाहेर उभ्या असलेल्या कारच्या काचांची तोडफोड करून मोठे नुकसान केले. त्यांनी डॉ. सस्ते यांना जीवे मारण्याची धमकीही दिली.
या हल्ल्याप्रकरणी डॉ. कुलदीप सस्ते यांनी आनंदनगर पोलीस ठाण्यात तक्रार दाखल केली. त्यांच्या तक्रारीवरून पोलिसांनी हल्ला करणाऱ्या अनोळखी व्यक्तींविरोधात मारहाण, दंगल, मालमत्तेचे नुकसान करणे, जीवे मारण्याची धमकी देणे यांसारखे भारतीय न्याय संहितेतील कलमांसह डॉक्टर संरक्षण कायदा (Maharashtra Medicare Act, 2010) अंतर्गतही गुन्हा नोंदवला आहे. पोलीस सीसीटीव्ही फुटेजच्या आधारे आरोपींचा शोध घेत आहेत. या घटनेमुळे शहरातील वैद्यकीय क्षेत्रात संतापाचे आणि भीतीचे वातावरण आहे.
